بودرة ولا جاز !

الأربعاء، 5 أغسطس 2009

اهلا بكم يا قوم لذيذ .. من يقرأ  كلامي منكم يعني بما  انكم في موسم الامتحانات .. ربنا يصبركم  ويكون في عونكم في هذه  الايام  التي هي شر لابد منه  لأي شاب  كما  نعلم .. و مسألة الخوف والفوبيا من الامتحانات   مسألة منتهية  عند الجميع  وهو أمر لا يختلف عليه اثنان ولا تتناطح عليه شاتان – زي  ما بيقولوا ! -  سواء عند الفاشل او المذاكر علي حد سواء  . فلا أسهل اذا كنت  تريد  انزال الرعب بقلب اي طالب من انك تروحله في وشه وتقوله مرة واحدة  :     الامتحانات جت ...!   وسيب الباقي علي قلبه و جهازه العصبي  واشياء أخري !     طبعا في هذه الأيام الخوف من ضعف النتائج والرسوب اشد من الخوف من انفلونزا الخنازير ..وفوبيا الدبلرة للركب..     وكله عايز ينجح ...الفاشل قبل المذاكر ..! ..والمصيبة انه بيحصل..(نجاح ده قبل ده ) .ازاي ماعرفش..     ده كمان ساعات بتلاقي ناس دحيحة وصمامين كتب يكتبوا  ويحضروا  ويشرحوا  ..وزمايلهم يصوروا  وينجحوا .....!     وهما ممكن يدبلرو !   النهاردة  هنتكلم  علي موضوع مهم جدا وحيوي وهو الملازم وتصوير الورق ..   ناس كتير بتنساه في الكلام  في الفضائيات في خضم المناهج العقيمة والكتب الجامعية ..فانهم يتناسون  موضوع التصوير رغم ان بدونه طلبه  كتير لن تعرف شكل السنة القادمة وستظل  ابد الدهر في السنة الحالية !   طبعا في هذه الأيام  الكل عارف ايه اللي بيحصل في الجامعة و قدامها وحواليها ..شارع بين السرايات في جامعة عين شمس ..اياه...     وممرات الشوارع قدام جامعة القاهرة اللي بتنقط مكتبات تصوير....     والكل بيصور....ممكن ما يعرفوش بيصوروا ايه بس الكل بيصور بردو ...      صوروا ..ودبلروا ..!      طبعا نوع من الطلبة مش هنتكلم عنة الا وهو النوع اللي بيذاكر تحت عمود النور بالليل ..نضارة كعب كباية ...مش واخد باله من لبسه من كتر المذاكرة...الجنس الاخر بالنسبة له كائن فضائي ماسك مدفع ليزر     يعني مالوش دعوة من الاخر غير بمستقبله ومذاكرته ..و انا بحب النوع ده الحقيقة...بيجيب من الاخر....ولكل شئ وقته ...عامة الناس دي مش هنتكلم عنها لانها ما بتصورش..! دول هما اللي بيمدو مكاتب التصوير بالبضاعة !     بالنسبة للناس اللي بتصور بيبقي في نوعين مالهمش تالت ..:         الصايع المؤدب ! :         الاخ من زباين الكافيه في الكلية ..حبوب وروميو ومخلي باله من نفسه ...بس بردو باكي علي مستقبله..ونفسه ينجح عشان خاطر بابا وماما اللي هيطقو منه لو دبلر ..!     اول من يكون عند مكتبة التصوير من النجمة و ساعات قبل النجمة ...ماسك دماغة وعينه عالساعة نفسه ياخد الورق بسرعة باي شكل ...لان فاضل يومين عالامتحان ...هيقضيهم مذاكرة وحفظ وقهوة وقلة نوم ...     غالبا النوع ده بنسمية ..: ماركة مقبول .. بينجح ..بس بالعافية ...ناس كتير بتسبح   في هذا المجال !!         حكمدار  الكلية !  :     الاخ ماركة : ض جيم ! من الناس العتيقة في الكلية ...من العلامات المميزة لشكل الكلية هناك ....حياته كوتشينة وقعدة قهوة وبيروح الكلية كل يوم ...عشان المقررات .. المقررات السهلة !!     وهؤلاء الكباتن بيروحو متأخرين لمكتب التصوير...وسالفين فلوس اللي بيصوروه!...ممكن يقعد نص ساعة في الطابور فاكر انه بيشتري عيش مش بيصور ورق ...! اهم حاجة عنده يجمع اكبر غنيمة ورقية     تحسسه بالامان النفسي ضد فوبيا الامتحانات .. وتحميه من شعور ماقبل الدبلره           بودرة ولا جاز       اتكلمنا عن نوعية الناس اللي بتصور ... ... فاضل نقطة الورق نفسة اللي بيتصور.....!!     الورق للاسف..ويا للمأساه علي رأي الاخ يوسف وهبي اكتريته بيروح المكتبات عن طريق الدكاترة و بلاش اتكلم تاني او اعلق عالنقطة دي لان في وزرا بيتكلمو فيها ولحد دلوقتي لا حل ليها ..     من الاخر كل اللي اقدر اقوله ان فكرة التعليم بالجامعة بالمحاضرات بتتلغي من اساسها ومن الاخر ..بالحركة دي ....!     ادي عن مصدر الملازم .....!     اما عن التكلفة والطريقة ...فربنا يكون في عون كل بنت وولد بيصور.... لان في مواد وحشة اوي و بتئذي موجوده في ورق الملازم ..!     لان الناس  اللي بتصور بيحطو في المكنة نوعين من المواد الرائعة التكوين :     بودرة ....... وجاز !     طبعا ...امال ازاي المناهج هتخش في مخيخك كدا وتتكيف منها ومن كلامها الا لو كانت متصورة بالبودرة ...وياسلام لو كانت جاز...!       طبعا لكل سعر ناسه وكل فولة ولها كيال ...ولكل شيخ طريقة...في تصوير بطريقة البوردة وده عامة بيبقي ب6 او 7 قروش لحد ال10 ....خارب البيوت والجيوب لذوي الكميات الكبيرة ...!     وفيه الجاز ...وده رخيص طحن(4 و5 قروش ) وردئ وبيبوظ مناخير العيال من شم الجاز ..وعينيهم من التمقيق في الكلام لانه ما بيبانش !     فحضرتك لو هتصور يعني ولا هتصوري ارجوكي الاول ....امسكي اول ورقة طالعة من المكنة كدا قوليله عايزه اشوفها واضحة ولا لأ ...: وإبداي الشم ...! لو لقيتيها بودرة مفيش مشاكل...اما لو جاز..فحاسبيه عالورقة كدا في الإنجاز....... المهم صحتك... بصراحة انا لو منكو اقضيها بودرة ....!