اتــجــوزت خــلاص ... والسؤال اطلقها ولا لأ ؟!!

الأربعاء، 5 أغسطس 2009

واتجوزت خلاص...   ايوة عملتها واتجوزت ..!!وميين : اخر من كنت اتوقع اني ممكن اتجوزها...! مرة واحد صاحبنا راح للكاتب الساخر  الامريكي اوسكار وايلد وقاله : يا سيدي ان زوجتي قبيحة ..!! اوسكار وايلد بأه مستناش ..وقاله الكلمة التاريخية واللي اتعملت مثل شعبي وحكمة :" كان اجدر بك ان تري نفسك في المرآه اولا ...!" بذكر كلمة زي دي لأن ناس كتيير تقول انت راسم نفسك لية يا كابتن انت عشان تقول :اخر من كنت اتوقع اني اتجوزها ...!! ..وانا بقوله ماشي كلامك صح ...بس اللي انا قصدي اوضحة انها مش وحشة بالمرة..بالعكس  ..جميلة جدا ..قمر  ..مالهاش حل ! بس مش ممكن واحدة زي دي تتجوز اصلا ..!! لية يا حبيبي ؟!( دة السؤال اللي فارض نفسه ..!) والجواب : استني هافهمك .. هبلة..!!! اه ..هبلة ...بمعني اخر بريييئة جدا....البنت زي القمر حتي لما كنا في الكلية كانت هيا الوحيدة اللي حسستني ان كليتنا مش مدرسة بنين..!! وكان كل الولاد هيتهبلوا عشان يكلموها...لان البنات التانية جنبها عاملين زي الصور ال4في6.....وهي بقي بوستر كبير متبروز !!! انما بعد مرتين تلاتة الطلبة بتقف معاها ...بيسيبوها علطول وبيهربو منها ...والسوال لية ؟.....والجواب انها بتحسسك بمدي ابتعاد و دنو مستواك عنها ...ايوة !   انك مش ممكن تستاهل واحدة زي كدا بالمرة ...البراءة دي كلها والجمال دة كله والرقة دي كلها..والصدق دة كله ...بجد حاجة اوفر لدرجة منفرة....ايوة اوفر ولو حتي في الكويس ...عمرك ما فكرت في كدا...؟ تخيل مثلا انك اجرأ واشجع.. واحد في الدنيا ..طبعا انت كدا بطل ...بس مش ممكن تعرف تعيش في الدنيا الا في مكانين ..: عنبر الكسور في القصر العيني ..!!..لأما عنبر الخطرين في العباسية ..!!...آدي مثال لا يقبل الشك..!!...تخيل بنت في الدنيا زي دي .......!! من وهيا صغيرة بتسمع كلام بابا وماما وما بتكرهمش ..وبتعمل الواجب وتشرب اللبن قبل ماتنام بدري ....وتطلع الاولي عالفصل...والمدرسات بيحبوها قوي وهيا الوحيدة اللي كانت بتقعد معاهم في اوضة المدرسات ( لان مافيش خطر منها بالمرة..!).....تجيب كل كشاكيلها وكاملة وعلي كل صفح الواجب نجوم ملونة بتضيع عليها مصروفها..وصور ميكي و بطوط و  ميمي .....وفي الثانوي عمرها ما قعدت ورا..ولا جت متأخرة ...!!...ولا لبست مخالف ...ولا طلعت رحلة ..و بتكلم المدرسين الرجالة وعينيها في الارض ...!!وبتروح تصلي في الفسحة...وبتقول الاذاعة...(دة في الثانوي ..)...وبناء علي كدة البنات بتكرها وبيدايقوها..ما بتعملهمش حاجة...بتروح تقول لمشرفة الدور ..!!! اما في الكلية ( اكيد كلية قمة قطعا يعني ..)....مش هقولك ما بتتكلمش مع اي شباب وبتاع...لا بالعكس ..دي بتكلم اي حد اي شاب ..لان فعلا مافيش حاجة في دماغها...بتاع الامن مع بتاع رش جنينة الكلية ...الواد اللي شايف نفسه الروش الروميو..والواد بتاع التيار الاسلامي اللي بيربي دقن طويييييييله ..وبيقص البناطيل من تحت لغاية لما يخليها عند ركبته..!!..تقعد في اي اسرة ..ما بتشاركش في انتخابات..!!..مالهاش دعوة بنشاط سياسي ..ولا اجتماعي ..ولا ترفيهي ..!! تخيل بنت زي كدا تبقي مراتك...تخيل كدا ..سبتها في البيت ورحت الشغل ..( وهيا طبعا مودعاك من البلكونة زي افلام مريم فخر الدين ..!)...وجيت لقيت بتاع الخضار حتي غالبها في الكلام والبيع......والبواب مابيردش عليها بس هيا متأكدة انه أكيد مشغول.......!!........وهكذا ... تقعد جنبها تتفرج علي ماتش الاهلي والزمالك..تقوللك فين الاهلي مش هو اللي لابس ابيض ..!!وتفتكر ان حازم امام هو خالد الغندور بس صبغ شعره..وتبقي اهلاوية فورا عشان انت اهلاوي ...!!! ايه رأيك في بنت زي دي .....عمرها يكبر ...وعمرها ما بتتغير .... لسة طفلة وبريئة وعلي نياتها ..وبتثق في اي حد....بتنام بعد المغرب بتلات ساعات عشان تصحي بدري تصلي قبل الشروق ..!! تتفرج علي سبيس تون و توم وجيري ..أما مسلسل فريندس..؟ هو قمة الانحلال فمبتكترش منه اوي ..اما فيلم بريف هارت....:  فهو فيلم رعب ولازم تشوفه جنبها عشان عالاقل تناولها المناديل وهيا بتعيط علي حبيبة ميل جيبسون اللي ماتت...!!!... تنام جنبها وفي بينكو عشرين عزول..أه.....دباديب ....!!..دباديب اكبر من حيوان الباندا شخصيا ....!! تتصل بيك في الشغل عشان تقوللك ان فية تحت السرير صرصار كبير ..وانك لازم تيجي بسرعة بقي عشان أنت الهيرو بتاعها...!! الارنب والقطة والكلاب اللولو مش عارفه ازاي لحد دلوقتي ما بيتحبسوش في جنينة الحيوانات في قفص الاسود..لانهم اشرس من النمور ...اما عن السجاير .....فأكيدأنا بطلتها ...لان السجاير :( بتعمل كااانسر...وما تشربهاش تاني حرام ...!!)   انت اية رأيك .....اتكل علي الله ... وأطلق ....ولا اعيش معاها وأخش بيها الجنة...؟!.         نسيت أقولك...لو اتطلقنا وسبنا بعض ممكن تعمل زي ماجدة في فيلم  المراهقات..وتنتحر...شكرا مش عايز نصيحتك ..انا هخش بيها الجنة !