الأربعاء، 16 سبتمبر 2009
صعد الغرب الي سطح القمر و نحن مازلنا نحاول اكتشاف قمر الدين فما أعظم المسافة بين الحضارتين ! احد المفاجيع في رمضان اجاب عندما سألوه انتا بتفطر ازاي وبأد ايه كدا احكيلنا .. فالراجل قال : 3 كبايات عصير ونص لتر ميه وطبق شوربة و7 حبات تمر، لحد كدا كويس ..ده لو انا يبقي شكراَ كدا مش هكمل اكل لان معدتي هتقرب تفرقع نسيت اقولكم ان محسوبكم رفيع جدا ومش بيحب يفتري في الاكل زي ناس المهم ان الراجل كمل وقال : بعد كدا ضفلهم حمامة أو ربع بطة ومعاها طبق كبير كبسة و 2 رغيف عيش علشان الِكشك ( وهي طبخة مصرية معروفة ) و ممكن يبقي في شوية محاشي و سمبوسك". فلما اتسأل خلصت ولا لسة قال الصبر يا سيدي ، فالحلو حتة بسبوسة بالقشطة أو كنافة بالفسدق ويا سلام لو حتتين قطايف عصافيري، وفي الاخر أشرب كوباية شاي علشان الهضم .. لحد كدا كويس وهنأجل قمر الدين والرز باللبن والمشمشية والقراصيا إلى ما بعد صلاة العشاء واحنا بنتفرج عالمسلسل .. أما السحور فلا داعي للحديث عنه الآن حتى لا أجهد أعصابك أكثر من اللازم". وفي دراسة نشرت بالاهرام قالت في الأسبوع الأول من رمضان فإن المصريين يأكلون خلاله 2.7 مليار رغيف و10آلاف طن فول و 40 مليون دجاجة ! يانهار ابيض .. 40 مليون فرخة ؟؟ اشحال مكانش في انفلونزا طيور يا جدعان كنتوا عملتوا ايه ! والدراسة عنوانها كان : المصريون يأكلون بمليار جنيه يوميا في رمضان.. و60% من الطعام يلقى في القمامة .. مليار جنية يا جدعان .. بسم الله ماشاء الله دحنا طلعنا دولة غنية واحنا مش عارفين .. مهو يا كدا لأما الاهرام بتكدب ..أي والله الاهرام بتكدب ! و أكدت الدراسة الصادرة عن الجهاز المركزي للتعبئة العامة والإحصاء ان استهلاك المصريين من الحلويات يزيد بنسبة 66.5% يعني لو الواحد بيعمل صينية كنافة واحدة في شهر شعبان العملية بتزيد يبقو 6 صواني في رمضان وانتا وشطارتك في الحساب ! وبيزيد استهلاكهم من اللحوم والطيور ل 63% والمكسرات بنسبة 25% نتيجة تبادل الزيارات والولايم والعزومات اللي بتزيد بنسبة 23 % مقارنة بباقي شهور العام. وإشارت الدراسة الى ان 60% من الطعام علي الموائد المصرية خلال رمضان بيلقي في القمامة ويتجاوز 75% في المناسبات والولائم . وانتا دلوقتي ممكن تقول انتا عمال تكتب وتتكلم وانتا تلاقيك في البيت عامل زي سيد بيه قشطة بتاع جنينة الحيوانات وهو بياكل .. وارد عليك اقولك لا والله ابداً .. فمش عارف ليه احنا دونا عن باقي بيوت عمارتنا و منطقتنا مش بنحب نكتر من الاكل في رمضان .. وان الكنافة والقطايف مدخلتش بيتنا في رمضان غير تلات مرات بالعدد لحد دلوقتي نصف الشهر .. وبان الأكل عندنا يعتبر بالمقارنة عند باقي الناس في رمضان .. عينات ! رغم ان الحالة المادية الحمد لله تسمح بعمل وليمة أو عزومة كل يوم .. ولكن القصة وما فيها اننا نؤمن في بيتنا بنظرية الشئ اذا زاد عن حده يتقلب لضده .. يعني الحمد لله لولا اني ماشي علي النظام ده واتربيت عليه انا كنت بقيت شبه الخرتيت من التخمة والتخن ..لكن الحمد لله الواحد رفيع لانه مش بيكتر ومش واخد علي اللهط ! سؤال اخر ... عمرك شفت قطة تخينة ؟؟!! عمرك شفت كلب فشلة ؟؟ او فار عنده كرش ؟! : ) أبداَ مش علشان هما حركتهم كتيرة ونشاطهم زائد .. رغم ان ده سبب .. انما لان العالم دي مؤمنة بان ما قل وكفي خير مما كثر وألهي ! يعني القطة بتفضل انها تاكل في يومها كله نص سمكة احسن ما تعمل زي اخينا ده وتبدأ ب 3 كبايات لبن وبعدين رز بالجمبري مع سمكة كبيرة وتحبس بايس كريم فانيليا ! علي كدا هيكون شكلها بعد سنة بالكتير اقرب لفيل ولكن الفرق انه من غير زلومة و بينونو ! |
