يا قـــلــبــي لا تـشـمـت !

الأربعاء، 5 أغسطس 2009






 


يا قـــلــبــي لا تـشـمـت !







كانو فريق الكوتشي !



- بالأمس خرج الأهلي من بطولة افريقيا والتي كان يحمل لقبها ..و خرج امام فريق أسمه كانو بيلارز ..! فريق أسمه اقرب  لأسم كوتشي من باتا..موديل كوتشي يعني مينفعش فرقة بالمرة  .. وفين .؟ في القاهرة !


اعتقد ان فريق اسمه كانو بيلارز ..فريق مني عينه يكسب سكر الحوامدية 1- صفر بضربة جزاء مشكوك في صحتها  ويكون  هذا  هو غاية المراد من رب العباد ..فريق مثل هذا  يخرج امس بطل أفريقيا وحامل اللقب ونادي القرن وثالث العالم ..وحاجات تانية كتير  افخر اني كأهلاوي بكتبها و احزن ان الاهلي لم يضعها في حسبانه امس ..!


عامة مش هتكلم كتير ..من الاخر هيا  كلمة  ( مش ادي ضهرك للترعة لأ !)


كلمة للاعب الأهلي احمد حسن  و كابتن  منتخب مصر الوطني بطل افريقيا  :


أرجوك ..


أرجوك يا  جدع .. ارحمنا وبطل كورة   احنا فينا حاجات  بعافية  .متبقاش انتا وأنفلونزا الخنازير !


يا قلبي لا تشمت !


- من ضمن الأشياء التي تفرج عني عندما يخسر الأهلي في اي مباراه يلعبها : هي الفرجة علي عمرو  اديب  سواء من الاوربت او بعد  كدا  علي اليوتيوب   ..لأني بجد بقعد اضحك جدا علي شخصية هذا الرجل .. ما يقوم به  من شماته علي الهوا لا تسمي جرأة ..


 بل هي مزيج من الغشم الإعلامي علي حب الشهرة والظهور علي استظراف  ومحاولة اضحاك المشاهدين  علي حبة اعتزاز بالنفس ومحاولة  لتحقيق لقب يطلقه عليه ناس كتير من محبي الفرجه عليه وهو لقب  ملك الفيديو


امس كان عمرو اديب يعطي درس في انعدام الانتماء لاي طفل صغير  .وهو يرد  علي احمد موسي ويقوله  لازم يتلبوا عشان يعرفوا ان الله حق ويقول له  بضحكة صفرا  انا روحي اتسحبت مني والأهلي عمال يضيع في أجوان ..وبعدها يتكلمون عن انتماء المشجعين للمنتخب و تضافر جهود المشجعين لصالح ممثلي مصر في البطولات !   طبعا لا تعليق غير بـ : آدي  دقني ان حصل  .. طالما  طريقة عمرو اديب وامثالة موجودة عندنا في مصر !


مبارة  من زمن آخر !


-  بخدكوا من قرف الكورة في مصر بفنياتها اللي مش موجودة لملاعبها اللي شبه الاسطبلات بمشجعينها الي مش بيشجعوا الا  قبل الماتشات  وبيسكتوا   أثنائها ..لاتحاد كورتها اللي لو مسكوه  أدارة مركز شباب الحاجة سميحة مش هيعرف ! الي كوكب أخر .. وكرة من زمن اخر ..


علي مباراة اغلب الظن ان المصريين لم يهتموا بها لأن الاهلي و كانو  كانوا   ( كانو اسم الفريق والي بعديها كانوا  اللي احنا عارفينها ! )  بيلعبوا امبارح  في نفس  توقيت تلك المباراه  ..  مباراة  للصفوة  فعلا ..  مباراة  الكلاسيكو  الشهيرة  واشهر دربي في العالم بين ريال مدريد وبرشلونة  بطل أسبانيا وبطل الدوري  بعد نتيجة  امس وبطل  الفن الكروي  الجميل وبطل ابطال العالم في نصب  السيرك علي اي فريق شايف نفسه  وبطل المتعة الكروية  الي مالا نهاية !


مباراة انتهت  بنتيجة  6/2 !  لبرشلونة ..  نصف دسته  اهداف لفريق واحد ! و8  اهداف في 90 دقيقة ولا أروع


تخيل انك قاعد مع هيفاء وهبي بتتفرج  علي مباراه فيها :  راؤول جونزاليس الاسطورة وروبن و شنايدر وكاسياس وسيرجيو راموس و ايتو وهنري وميسي  وتشافي !   هتبص لمين  وقتها ؟؟ ..لهيفاء  وهبي ؟؟  


مفتكرش !


مباراة لا تعليق عليها  الا  تعليق رؤوف خليف التونسي المشهور :


مباراه من  زمن آخر !


 


بطولة علي كف خنزير !


- بشري لكل المصريين  المفروسين من منتخبنا الوطني ..احنا هناخد كأس القارات !  ايوة  بجد مش تهريج   هناخدها فعلا  بنسبة  90 % .. واليكم السيناريو :


  البطولة  من الأخر  كدا هتتلغي بشكل مؤكد  علشان انفلونزا الخنازير .. لان  البطولة في جنوب افريقيا وهي دولة معروفة  بفظاعة اعداد قطعانها من الخنازير .. بالاضافة الي وفود  الفرق من امريكا  وهي دولة  مصابة ..والبرازيل ايضا (و الاتنين معانا في المجموعة ! ) اذن البطولة  هتتلغي


هنا  بقي المهموز اللي  هنعمله للعالم كله ..  احنا هنقول اننا مش منسحبين ! ايون ..احنا بقي المصريين وبنتحدي انفلونزا الخنازير وميهمناش .المصريين اللي بناكل بلوبيف الكلاب وبنشرب مية المجاري وبنموت عالعيش هنخاف من الخنازير ؟ !  فشر ! 


طبعا   بما ان كل الفرق  هتنسحب كدا كدا من البطولة .. احنا نصمم .هما ينسحبوا   ..واحنا نصمم ..لغاية  ما الفيفا  يزهق مننا يقوم يحسب نتيجة البطولة  بالقاعدة الشهيرة  بتاعة خسارة المنسحب ونطلع لساننا لكل الفرق  ونقولهم  البق الشهير اللي كنا بنقولة لبعض واحنا صغيرين بنلعب كورة :  المسحوب مغلوب  هييييه  !  ..اذن  النتيجة الطبيعية ان مصر تفوز  بالبطولة  .. ومبروك مبروك  مبروك ...


مبروك عليكم و علينا !

0 التعليقات:

إرسال تعليق