الأربعاء، 5 أغسطس 2009
 |
في احد فرق الدوري البرازيلي عندما شاهد المدرب مهاجم الفريق يتكاسل عن اداء واجبه الهجومي و انه عمال يشوط في اي مكان حتي عواميد الإضاءة . الا بين التلات خشبات ( الجون يعني ) : وجد المدرب انه لا فائدة من هذا اللاعب وزملائه الا بالعقاب الرادع لجعل هؤلاء اللاعبين يحسوا علي دمهم . فما كانا من هذا المدرب الا انه وقع عقوبة علي اللاعب ورفاقه بألا يتدربوا غير وهما لابسين بيبي دولات ! ( ايوة متستغربش ) قمصان نوم يعني لكي يحترم هؤلاء اللاعبون انفسهم ويشعروا انهم تخاذلوا وانهم ليسوا رجالا في الملعب ! وفعلا احترم اللاعبون القرار ونزلوا التدريبات بالبيبي دول ! وكان التدريب في منتهي القوة وقتها . فاللاعب الذي ارتدي البيبي دول موت نفسه في الملعب كي لا يعود لإرتدائه . أما من لا يلبسه فبردوا قطع نفسه في الملعب كي لا يرتديه من الاساس . والنتيجة : تقسيمة في التدريبات ولا مباريات نهائي أوروبا ! نطلع كدا خبط لزق أيها السادة الكرام من هذه القصة علي استاد القاهرة أمس حيث مباراة زامبيا اللي اتعادلنا فيها 1/1 وربط بين القصتين ليكون السؤال : كم واحد من لاعبي المنتخب يستحق ان يرتدي البيبي دول طيلة بقية حياته الكروية ! حقيقي يعني الواحد مش عارف يقول ايه علي اللي شفناه امبارح . انا اساسا مش بحب اتابع مباريات وخاصة لمنتخبنا مع الاعتذار لاي واحد عامل نفسه وطني وهيطلع دلوقتي يقولي مصر هيا امي ونيلها ابن عمي ! الا اني امبارح قلت هه . يمكن نعمل حاجة يمكن نلعب كويس زي أخر مرة لعبنا فيها كورة زي المخاليق في غانا 2008! ويشاء القدر ان تخرج المباراه نسخة طبق الأصل من مباراة دوري الحرافيش او الحناكيش او الخرابيش بين نادي مثل كاوتشات اسيوط و سكر أبو قرقاص ! فيه ايه الي حصل امبارح ده بالصلاه عالنبي . مش عارف ! مش ممكن يكون ده منتخب مصر بطل افريقيا ومش ممكن تكون العيال دي هيا هيا اللي كسبت كوت ديفوار و الكاميرون وعلمت علي كل معلمين افريقيا ! ومش ممكن يكون ده حسن شحاته اللي روض كل الأسود والنمور والافيال والفهود وكل الحيوانات اللي خوفونا منها في أفريقيا ! امبارح كان حسن شحاته آخره خالص يروض كام شمبانزي ... وبالعافية ! ونشوف التشكيل من اليمين للشمال ! : عصام الحضري : رجل معلكش لوم نهائي الجون دخل فيه من غلط للأخ الشقيق محمد شوقي اللي كان مدي ضهره للمهاجم بدلا من ان ياخده في صدره . طبعا كانت غلطتك الوحيدة هي الترقيصة اللي رقصهالك الواد كاتونجو بتاع زامبيا . بجد كان شكلك وحش يا عصام . اوعي تعمل كدا تاني ! محمد بركات : طب حسن شحاته كان شارب توكسفين ونزلك ناحية الشمال وانتا بتلعب برجلك اليمين. مفيش فيك لسان تقوله يا معلم حسن كدا مينفعش انا كدا مش هعرف ارفع ولا كورة ! لأ حضرتك سبت كل حاجة ونفذت الأوامر والنتيجة كانت ان حضرتك مرفعتش ولا رفعة وكان الجنب الشمال لمنتخب مصر مختوم بالشمع الاحمر وان الواد كاتونجو كان معلم عليك طول الماتش وكان فاتح شارع لمنتخب زامبيا باسم : شارع كاتونجو ( ميدان الجهة اليسري لمنتخبنا سابقا ! ) احمد المحمدي : واو ! رائع والله يا احمد . والله انتا سكر . جبت الحرفنة دي كلها منين معرفش . ولولا الرفعة ( هي كانت شبهها اوي يعني بس مشيها رفعة ) اللي جه منها الجون اليتيم لمنتخبنا : انتا كانت الجماهير استنتك برة الملعب علشان تعمل معاك واجب ! وائل جمعة : رجل المباراة الاول بلا منازع . لاعب محترم بلا فلسفة ولا اي همبكة كروية علي شاكلة هاني سعيد باشا مثلا . التزام بالمكان وتركيز طوال المباراه ولا يقع في الرايحة والجاية وماسك نفسه علي عكس كابتن احمد فتحي اللذي كان يلعب بطريقة أوعي الفحت لتقع تحت ! محمد زيدان : والله انا ماهتكلم عليك غير بسطر واحد : انتا المفروض تحترف في مركز شباب اطفيح والله علي مستواك بتاع امبارح . مش ممكن تكون لاعب في بروسيا دورتموند الالماني بطل اوروبا . مش ممكن . انتا اكيد كنت واحد شبه زيدان . اطلع يا سيد واخلع الباروكه وقولنا محمد زيدان فين ! محمد بن شوقي : كأنك كنت بتمثل دور في فيلم فجر الإسلام بشعرك ده وطريقة لعبك الخشنة مع الجميع التي لولا ان الحكم كان حنين ومكانش فايق زي ما شفنا امبارح لكان ادالك عشرين انذار . يكفي عرقلتك للاعب زامبيا في وسط الملعب بطريقة كانت ستجعل اي حد مبيفهمش كورة يطردك . بجد يعني الولد بتاع زامبيا صعب عليا . كنت اديته بطوبة احسن يا جدع ! احمد حسن : بجد احمد حسن لا اقبل بالمرة انه يكون كابتن منتخبنا في كأس العالم ( لو تأهلنا يعني ! ) مش ممكن يكون ده قائد الفرقة بطريقة لعبه المستفزة جدا دي ! بطئ رهيب وتفكير كتير قبل اي تصرف وميس باص كتير جدا . ده غير انه بيقع كل شوية ويعيط ويبقي نونو أوي . احسن تعليق عليك هية اغنية بتاعة شاب فرفور كدا كان بيقول فيها : أديني بمبة . اديني بمبة افجر بيها المعتدي !! عماد متعب : والله بجد انتا تعبت كل المصريين امبارح يا متعب . متعب قلبنا ورافع ضغطنا ! صحيح مجتلكش ولا تمريرة كويسة ولا رفعة تحترم نفسها لكي تسجل كأي مهاجم . الا انك كان ممكن تعمل زي عمرو ذكي امس . تسقط للاعبي الوسط . تشغل الدفاع الزامبي بتحركاتك وتخلق مساحات وتستغل انصاف الفرص . الا انه من الواضح ان سيادتك لسة كنت فاكر انك في الاتحاد السعودي حيث محمد نور يعطيك الكرة امام المرمي وهشام بوشروان يلزق الكرة علي دماغك لكي تلمسها داخل الشباك ! . والنبي المرة الجاية يا عم متعب ابقي دوس علي نفسك حبتين ! ميدو باشا وعمرو ذكي بيه : بغض النظر عن مستواكما و عن ان عمرو ذكي أكل النجيلة امبارح . لكن هناك نقطة وحيدة تستحقان عليها لبس البيبي دول ! بجد يعني يرضي ربنا يا عالم يا محترفة يا بتوع ويجان يا بتوع الدوري الانجليزي . يا اصحاب الملايين والعقليات الكبيرة والتصرفات الاحترافية . ان واحد زي كاتونجو بتاع زامبيا يخرجك عن شعورك انتا وهو امبارح ويجركوا لخناقة قعدت خمس دقايق يضيع بيها وقت وانتا وهو بمنتهي السذاجة ودونا عن بقية لاعبي منتخبنا اللي نصهم محليين تيجوا انتو يا محترفين و واحد فيكم ينفعل ويزعق وواحد يمسك في لاعب زامبيا في مشهد جعل مدرب زامبيا يضحك علينا في شماته عجيبة اوضحت ان فعلا الكورة عمرها ما كانت باحتراف في اندية عالمية ولا فلوس بالاكوام . الكرة ببساطة مجرد ملعب اخضر وكرة ولا اسامي علي الاطلاق . فقط لاعبين يعرقون ويؤدون ويمسكون اعصابهم ليكون الفوز هو النتيجة الطبيعية لكل ذلك وحتي ان كسبوا حظ : فإن الحظ لا يأتي الا لمن يستحقه !
شاهد اهداف المباراة |
0 التعليقات:
إرسال تعليق