ابــن الـــوز غـــرقـــان ! ( ظاهرة أبناء النجوم )

الأربعاء، 5 أغسطس 2009

 

امير شاهين اخو الفنانة الهام شاهين والحكم لك : هل ينفع يظهر علي الشاشة ؟ اي شاشة ؟!    احساسك ايه لو جيت في مرة بتقلب الجورنال بتاعك زيك زي اي مواطن عادي .. عديت اول صفحة  اللي محدش بيقراها كالعادة  الي  الصفحة التانية فالثالثة  ..ثم  استقريت علي صفحة الفن لتجد خبر يقولك : " أربعة من أبناء النجوم في فيلم واحد اتفقت المنتجة اسعاد يونس مع ثلاثة من ابناء النجوم على تقديم فيلم واحد وهم هيثم احمد زكي ومحمد عادل امام واحمد الفيشاوي ويخرجه ايضا ابن احد النجوم وهو مروان وحيد حامد، الفيلم يغلب عليه الطابع الكوميدي ولم يجر الاستقرار بعد على اسمه خاصة انه لايزال في مرحلة الكتابة حيث يشارك في كتابته اكثر من سيناريست شاب ومن المفترض ان يبدأ تصويره بعد اسابيع قليلة ليعرض في عيد الأضحى المقبل " المحترمة اسعاد يونس بقت منتجة ..طيب ماشي بلعناها .. اتفقت  مع ثلاثة  مش واحد من ابناء الفنانين المحروس هيثم والمحروس محمد وكمان أحمد واخراج مين : مروان ... مروان وحيد حامد ! صلاة النبي . طبعا هنا الموضوع محتاج قعدة كدا  وكبايتين شاي عشان بجد الموضوع بقي أوفر .. افتح التليفزيون زيي زي اي مواطن  وخاصة  لو كنا في رمضان حيث  هو الموسم بتاع العالم دي والفرصة اللي بيستناها اي فنان كبير محترم علشان ( يلحم ) ابنه او بنته في مسلسل  منحوت القصة عديم الفكرة طويل الحلقات كثير الاعلانات . لتجد اسم النبي حارسهم وهم ظهروا كلهم في رمضان الماضي واللي قبله . عد معايا  كدا  و استغرب مع العد فعلا  الموضوع اوفر أوي : تعرف  ِتعِدْ ؟!     هيثم احمد ذكي .. محمد عادل أمام..  احمد  الفيشاوي .مروان وحيد حامد .عمرو ياسين ( ابن الاستاذ محمود ياسين )! .احمد سعيد عبد الغني .. احمد صلاح السعدني ..مي نور  الشريف  ..  وايتن  عامر ( اخت  الابلة وفاء عامر ) بقت الواسطة كمان بالاخوية يعني اللي مخلفتش بقت بتجيب اختها !  وفي عندك الموهبة الجميلة صاحبة أجمل ضب سينمائي الفاتنة رانيا فريد شوقي  . وخد عندك  احمد فاروق فلوكس و  احمد جلال عبد القوي  واحمد مصطفي الدمرداش و محمد احمد ماهر  اللي عمل دور احمد رمزي في مسلسل السندريللا   ..وعندك  صلاح شكري سرحان ! ثم  عمر خورشيد  ابن  علا غانم  ( ملهاش  لسة في الفن  10 سنين علي بعض ومع ذلك قررت تأمن مستقبل العيل ! ) ثم هناك  هيثم عادل امام  ايضا مش  محمد بس ( سيبكم من رامي امام  لانه مخرج مش ممثل ) !..يعني الموضوع بقي بالجملة اتنين  اتنين  مش فرداني !  و علي ذلك  ايضا خد عندك ياسر جلال  ورامز جلال  ولاد  عقبال املتك المخرج توفيق جلال ورانيا  محمود ياسين واخوها عمرو ! و  محمد محمود عبد العزيز  وكمان اخوه كريم  محمود عبد العزيز . ومحمود ده غير محمود عبد العزيز التاني  المخرج  الشاب ابن المخرج  بردو محمد عبد العزيز !!  زميل المخرج الشاب احمد نادر جلال ! وده مخرج شاب بردو  خد موهبة والده  من افلامة  فيلم واحد من الناس ..اللي كانت بطلته منة شلبي  التي لا ننسي  انها بنت  الراقصة كريمة الأصل  زيزي مصطفي !     مؤامرة !        كل دول بيتم  دفعهم دفع في رمضان بالذات  وأفلام الأعياد  واهو  موسم  وسبوبة  وعيش و خلي الناس تعيش يا عم  واهو الواحد يتطمن علي مستقبل   ولاده واهو كارنا اللي نعرفه احسن ما نبهدل عيالنا في كار  منعرفوش  ! فتجد  ترويج لهم  عن طريق الجرائد  والمجلات  مدفوعة الأجر من نفس الفنانين  مقابل الظهور فيها ! او  ممكن يتم  حشد  حبة منهم في عمل واحد  جماعي  يشتركوا في تكاليف انتاجه  في عملية اسمها تلميع او تظهير او تشهير مش عارف بيسموها ايه بالضبط  مثلما  رأينا في الخبر اللي فوق ..ولو مش مصدق وفاكر اني بتكلم  بنظرية المؤامرة هقولك  لأ   ده كل  حاجة  مقصودة وبحساب  بقمارة فيلم اسمه شباب عالهوا ...كان فيه  أحمد الفيشاوي ومحمد محمود عبد العزيز وأمير شاهين اخو  إلهام شاهين واللي نحتت في الصخر علشان يطلع ممثل  ولسة مش عارفة  ! ومحمد أمين ابن  الفنان الشهير برضو امين الهنيدي ! ). مش عارف  قلت  كمان دنيا سمير  غانم  ولا لأ  ودي باتنين  لانها بنت  اتنين فنانين مش واحد ..سمير غانم ودلال  عبد العزيز  .. بالضبط زي عمر يوسف ..ابن  حسن يوسف  وشمس البارودي ! اللي قام بالتمثيل في فيلم اسمه    : ( شارع 18 ) ! طبعا  لا ننسي  اسماء اخري  وان كانت  لها  موهبة حقيقية  مثل احمد السقا وحنان كرم مطاوع  وريهام عبد الغفور وهناك  استثناءات بسيطة  جدا   لم ترضي بان يطلق عليها  انها نجحت بالواسطة مثل شريف رمزي اللي بيتعامل مع اي منتج  الا والده   وكريم  عبد العزيز  الذي لم يقدمه والده المخرج محمد عبد العزيز في اي  عمل قام به . وطبعا سؤال فارض نفسه بالحاح فظيع يقرب من الوقاحة !  : هل كل الاسامي دي كلها اللي  تعبت في جمعها   و ترتيبها  و رصها هنا .. كلها كلها  ..موهوبين بالفطرة  وانهم فنانين اولاد فنانين و وز  عوام  طالع لابوه زي  ما بنقول في المثل !   ولا  الموضوع فعلا  سبوبة  وواسطة ومحسوبية وتامين لمستقبل في شئ اصبح بيعتبر مهنة وليس فنا  يعتمد علي موهبة ربانية .   في الغناء ايضا ! اخر المتمة بقي شئ فريد  من نوعه  .. الموضوع اصبح فعلا سخيف جدا بحركة  جديدة لم يشهدها الا  العرب ولم يخترعها الا هم .. الموضوع  قلب كمان علي الغنا  والفيديو كليب بالأخص ..المغني  او المغنية  بيمهد لابنه السكة من دلوقتي وبيشهره  مش عارف علي امل انه يلحقه بالتمثيل بدري ?  هيبتدي بدور الابن في الافلام مثلا  ولا ايه  الله  أعلم ! شفنا  المطربة نوال الزغبي عملت اغنية  بنفس اسم  بنتها  ( تيا ) !  و طلعتها معاها في الكليب طوال مدة العرض ! و علي طريقة اشمعني قامت شيرين عبد الوهاب  بالغنا في كليب اسمه  بحبك يا امي و طبعا طول الوقت مع بنتها الكميلة مريم ! صلاة النبي ..  طبعا لا  ننسي ظهور  عمر ابن  المطربة انغام كبطل  كليب عمري معاك ! شيماء سعيد بقي مسكتتش  وقدمت كليب «في يومين» واللي  استعانت فيه بابنها محمد وقالت: " لن أستعين بمحمد في الكليب كطفل، بل انني قصدت ذلك لأني غنيت الأغنية له." ! أما بالنسبة للأفلام فالحاج  ادوارد جاب ابنه مايكل في فيلمه الجديد «كلام جرايد» ! ادوارد قال بالنص : أجسد في الفيلم دور محامي ضال وعندما يلتقي بالطفل داخل الفيلم يتغير مصيره تماما، لأن دور الطفل رئيسي في الفيلم ولذلك اختار المخرج طفلا قريبا مني ولم يكن أحد أقرب لي من ابني.! الفنان أحمد السقا ازاي يسكت ؟ في فيلمه الجديد «ابراهيم الأبيض» من اخراج مروان حامد ( مروان وحيد حامد ) طبعا استعان بابنه  ياسين ليجسد دور ابراهيم وهو صغير ومن ناحية أخرى، استعان الباشا  تامر حسني بابنتي صديقه الفنان احمد زاهر وهما «ملك وليلى» واللتين تجسدان دور ابنتيه هو والفنانة ميّ عز الدين.في الجزء الثاني من العمل الملحمي  عمر وسلمي ! سؤال المشاهدين في المنازل :  -  كمية الاسامي الفظيعة اللي في الموضوع ..دخلت  مجال التمثيل عن طريق : 1- الصدفة البحتة  حيث ان صدفة  احسن من الف ميعاد ؟ 2- موهبة ربانية خارقة وجدت في الجينات الوراثية من أبائهم؟ 3- تم التوسط ليهم عملا بمبدأ : خلينا  نتطمن علي  مستقبل الولاد ؟!