هل المرأة كائن رغاي ؟!

الأحد، 9 أغسطس 2009

عايز تشوف ظاهرة ؟؟ ..عايز تعاين بنفسك معجزة ؟! يبقي تسيبني اشدك من ايدك كدا وامشيك معايا بعد الشغل .او ناخد اجازة ونركب ميني باص .. ويا سلام لو بنتين او اتنين ستات قعدوا جنب بعض ! شئ منتهي الجمال ..بحس اني مصطفي محمود في برنامج العلم والايمان ..وانا عمال اتابع واتأمل في الطبيعة واحس اني قدام ظاهرة مدهشة بتابعها عن قرب . انك تشوف كائنين في الكوكب ده مش بيبطلوا كلام لمدة تزيد عن الساعة ..والله بجد ..اكتر من ساعة كلام متواصل وهات وخد ..لا والكلام متبادل من الطرفين مش بس مثلا واحدة بتتكلم وواحدة بتسمع ؟؟! لأ ده الكلام والسماع بيحصل في نفس الوقت .. قدرة عجيبة جدا لدرجة خلتني ابحلق في واحدة منهم في اخر موقف نفس بحلقة واندهاش العالم داروين وهو شايف قدامه حشرة من نوع نادر ! والحقيقة ان الموقف ده دفعني دفعا اني اقرا واتقصي وابحث عبر صديقي جوجل لأجد كلام مدهش ..الست بتتكلم في المتوسط في اليوم الواحد 20 الف كلمة !!! والرجل 7 الاف كلمة بس ! مش كدا وبس دي الدراسات اثبتت أن المرأة بتتفوق على الرجل في بعض القدرات زي انها بتتذكر المواقف العاطفية واستدعاء أشياء من الذاكرة الرجل لا يعرف تذكرها وأن المرأة دائما دماغها في حالة تفكير مستمر بينما الرجل في حالة راحة مستمرة وان المرأة باستطاعتها أنه تتكلم وتسمع في نفس الوقت ! بسبب القدرة العصبية عندها لانها تمتلك 30% من الاتصالات العصبية المخصصة للكلام فقط ! يعني دراسات كتيرة اثبتت ان المرأة ثرثارة ده اولا .. وانها كدا اكتر من الرجل ده ثانيا .. ثالثا الاسباب بقي لده زي مثلا : أن مخ الأنثي يحتوي علي 11 بالمائة من الخلايا العصبية أكثر من الرجل وبخاصة في المنطقة المسؤولة عن مراكز الإحساس والذاكرة وان الست بفضل هرمون الأستروجين بيخليها اكثر حركة وفكر وتواصل عن الرجل بكتير جدا ..اذن يبقي ده حق مشروع ليها انها تبقي رغاية ! هنا تحضرني الكلمة الشهيرة بتاعة فيلم العار علي لسان نور الشريف لحسين فهمي .. حقها ولا مش حقها .. وطبعا هنرد زي ما محمود عبد العزيز رد عليه : حقها يا ابو كمال ! ستات مصر .. ايه الاخبار ؟! طبعا الست المصرية متفوقة علي قريناتها في كل زمان ومكان ..في الطب والحساب والكيميا وكمان دخول المطبخ وعمل الملوخية ده غير شغل البيت : ) حتي كمان في الرغي الدراسات اثبتت ان المرأة الشرقية والمصرية اكثر رغيا وثرثرة من المرأة الاوروبية والغربية وتتفوق عليهم بما يعادل – يعني زيادة عليهم – بـ 4 الاف كلمة في اليوم الواحد وطبعا العلماء تعاطفوا مع المرأة المصرية باعتبار ان ظروفعها هي اللي بتدفعها للثرثرة او الرغي والفضفضة . يا سلام .. أد ايه المرأة المصرية عظيمة ! يعني الظروف خلت الست المصرية تتكلم كل ده طيب الرجالة جالها تخلف من الظروف اللي احنا عايشين فيها ..دحنا من اعلي نسب التدخين في العالم يا جدعان ! والمصيبة ان الراجل بيكتم في صدرة وبيسكت لغاية ما يطق لان معروف نفسيا ان الكبت ضار جدا بالصحة .. يا بخت ناس ! الرغي .. مفيد جدا للصحة ! علي الجانب الأخر اثبتت بردو الدراسات – دراسات يعني علم مش اي كلام – ان الكلام والفضفضة من الاشياء الهامة جدا .. الست بتفضفض وقت الخنقة ووقت التعب والضيق وبتتكلم مما يجعلها اكثر قوة وصفاء نفسي و قدرة علي مواجهة المشاكل .. حتي عند الضغط الشديد تفضفض بواسطة الدموع والعياط ..بينما يكبت الرجل ما بداخله ويكبت .. ويكبت حتي ينفجر في الأخر كما البالون وينزل علي مفيش ..ضغط وسكر وانسداد شرايين و قولون عصبي وما خفي كان اعظم .. الله يكون في عوننا .. مش زي ناس : ) خلصت الدراسة علي أن أن الثرثرة مفيدة للصحة، وذلك لأنها تطيل العمر وتغذي الروح وتساعد على التقارب من الآخرين . يعنى المرأة تحب الكلام والرجل يفضل الصمت وربنا كملهم ببعض فالراجل بطبيعته عصبى واثبت برده العلم ان لو واحد عصبى لقى الى قدامه ساكت بيزيد من عصبيته فالست بكدا بتهدي الراجل . سبحان الله ! طب والحل ايه يا راجل ! هقولك علي النصيحة اياها والتي سيكون لها نفس مفعول نصيحة ادي ضهرك للترعة الشهيرة ادي ضهرك للكتمان والسكته .. عمر ما هيجيلك انسداد ولا نقطة ! فنصيحة لكل رجل علي أرض مصر .. تكلموا وفضفضوا والا فستنفجروا .. وان انفجاركم لعظيم !