وزارة الـمـايـوهـات !

الأحد، 9 أغسطس 2009

أخر خبر قريته وعجبني جدا ..لدرجة اني مسكت اقرب حاجة تصلح للضرب في بيتنا وكان نفسي يكون تحت ايدي شخصية ما هتعرفوها لما تقروا الخبر . الخبر بيحكي عن تقدم 50 نائب في مجلس الشعب بطلب احاطة لرئيس المجلس فتحي سرور بيطالبوا فيها باقالة وزير السياحة احتجاجاً علي قراره بمنع دخول السياح الاجانب الفنادق الخمس نجوم وحمامات السباحة بها الا بالمايوة البيكيني ! . يعني السايحة من دول متعرفش تخش حمام السباحة الا بالبيكيني ..! مايوة قطعتين يعني .. طب والله الراجل جاي علي نفسه ليه مش عارف ..طيب متخليها قطعة واحدة احسن ولتكن نضارة ! وتسيب الباقي علي الهلاهولي كدا سداح مداح وحتي تبقي الفرجة كاملة يا جدع ! اقسم بالله العظيم يا جدعان ان الهوا بتاع مصر والمية بقي شكلهم فيهم حاجة مخلية الناس كدا ! شئ غير طبيعي ابدا .. ان هناك بني أدم خلقة ربنا زينا ..بياكل ويشرب ويعيش ويتعايش ممكن يفكر في حاجة زي كدا ..الا انه يكون مريض ! انه طالما مسئول فينفع من خلال سلطته يطلع قرارات في منتهي التخلف .ولا بتخدم اي حد الا اصحاب المصالح والاهواء الشخصية . ولولا اني محترم ومش بحب القاء الاتهامات جزافاً لكنت قلت ان الرجل ده يهودي .. او حد يهودي سلطه علينا علشان يعمل فينا كدا ! والغريب جدا ان اول سائحة جم يطبقوا معاها مثل هذا النظام ( واسمها كارولين ) في فندق كارلوس بمرسي مطروح .. السائحة مسلمة ..! اجنبية لكن مسلمة وهي من النرويج .. جات الفندق زيها زي مخاليق ربنا علشان تستجم وتنزل المية وتستمتع بحلاوة شمسنا وخفة ظلنا .. و هطل شعبنا اللي مستمر طول السنة ! فلقت الامن بتاع الفندق بيجبرها علي ارتداء البيكيني قبل نزول حمام السباحة لأما يمنعها من دخوله! طبعا كان اول حاجة عملتها السائحة - بعد الحسبنة في سرها علي ناس هذا البلد الغريب جدا والأغرب من اي شئ اخر في المجرة – انها قامت بتقديم بلاغ في السفارة وشكوي ضد الفندق ووزارة السياحة نتيجة السلوك اللى اصابها بصدمة خلاها تقارن بين اللي بيحصل فى اوربا و مصر رائدة العالم الاسلامى – زي ما بيقولوا - وقلعة الوسطية الاسلامية والاعتدال الاسلامي !- زي ما بيقولوا يعني - وبعدها غادرت القاهرة وقررت عدم العودة اليها مره اخرى ! هنا السؤال بقي ... بجد لو واحد عنده اجابة ياريت يبعتلنا ! .. ايه غرض وزارة السياحة من فعل زي كدا ! هل مثلا الاخ الوزير الشقيق مقيم في فندق خمس نجوم وغرضه يشوف سائحة معينة بالبيكيني مثلا !! والله جايز ! هل مثلا احنا خدنا فكرة عن السياح انهم لازم يكونوا قالعين ظلط ملط ؟! هل الناس اللي في الوزارة تعبوا من ستات مصر فقرروا انهم يشوفوا حظهم في اللحمة الاوروبي ! هل مثلا هما بيعتقدوا ان تشجيع العري ونشر الفاحشة مش هييجي علي دماغاتنا بالويل والعذاب من ربنا في الدنيا قبل الاخرة ! هل مثلا غايب عن ذهنهم ان كل فلوس السياحة اللي بتيجي دي منزوعة البركة ومفهاش اي فايدة لانها جت بالعري والفساد و هي نتاج لحفلات العري واستعراضات الشذوذ وحفلات ملكات الجمال اللي بتتم سنويا تحت رعاية وزارة السياحة ؟! والنبي يا جماعة لو حد فيكم عرف يوصل لحد من وزارة السياحة ..يقولهم ان في مواقع و قنوات اباحية بدل المسخرة اللي عيني عينك اللي مضحكة علينا العالم كله او ممكن يعني لو معهمش فلوس للحاجات دي نتبرعلهم حتي يجيبوا مجلات حلوة اهي حاجة تسد شهوتهم او تطفي نارهم .. او قولولهم يتجوزوا !