البيضة ولا الفرخة ؟

الثلاثاء، 4 أغسطس 2009

بداية انا اعرف ان الصورة شارحة نفسها ولاتحتاج لشرح . ولا تستحمل تعليق الحقيقة ! اخترتها من بين صور كثيرة جدا لانها رغم بساطتها ( مجرد مصنع بيخرج من فوهته عادم سام بالقرب من المركز القومي للسموم )! في ناس شايفه انها عادي يعني . الا ان حاجة زي كدا بتستفزني للتفكير جدا . وللتأمل . وبعد التأمل بتقلب بضحك من النكت اللي بنعيشها كل يوم ! فمجرد التفكير في حاجة زي كدا بتقوي عندك نظرية الاحتمالات اوي و الله وبتدفعك للتفكير العلمي المنهجي السليم . وبتعودك تبقي فيلسوف لانك مش هتسأل بازاي بس . لأ ده انتا هتسأل بـ ليه وعلشان ايه . والاستفادة ايه . اسئلة يقف المفتش كرومبو نفسه مسبهلا امامها ! اول سؤال هو السؤال الازلي : البيضة ولا الفرخة ! بشكل اخر . اي العنصرين دول قبل التاني !! هل هو المركز القومي للسموم مثلا اتبني الأول ؟! وعلشان تعبوا من مشاوير احضار عينات السموم لاجراء التجارب عليها جابو مصدر للسموم نفسها جنب المركز وخلاص وهو المصنع ؟! ولما يحبو ياخدو عينة يطلعوا اي موظف مستغنيين عنه وليكن عم شندويلي بتاع البوفيه يطلع يشم هوا من شباك المركز مثلا ؟! ولا المصنع اتبني الأول ونظرا للضحايا الكتار الي ماتوا وبيمرضوا ويتعبوا وبيعانوا بسببه قرروا نقل المركز او انشاءه جنب المصنع ده وخلاص ؟ واهو يبقي زيتنا في دقيقنا ! ثانيا مدير المركز المبجل ساكت ازاي علي حاجة زي كدا . طيب مينقل المركز جنب المصنع احسن وخلاص واهو يبقي اقرب ! طيب ايه جدوي انشاء المركز ومعالجة الناس فيه رغم انهم كل ما يعالجوا واحد يستقبلوا اتنين غيره فورا من السكان اللي جنب المصنع ؟! وليه اصلا واحد مصور صورة زي كدا. مصورها علشان يفرسنا ولا ايه ؟ وهل اصلا الصورة دي حقيقية ولا فيلم كارتون وهل احنا وصلنا للمرحلة دي من انعدام التفكير والتناحة الاجتماعية والاسبهلال الصحي تخلينا نعمل حاجة زي كدا ؟! اخيرا سؤال المشاهدين في المنازل لكل اعضاء الموقع ! السؤال بيقول: المنظر اللي انتا شايفه ده بيعبر عن ايه في رأيك ؟ : 1- صاحب المركز يقرب لصاحب المصنع فمقدروش يستغنوا عن بعض لان الدم عمره ميبقي مية ؟! 2- الصورة دي مش حقيقية و متاخدة من فيلم خيال علمي امريكي اسمه ( اغبياء الوطن) ؟! 3- الفكرة دي اتعملت علشان الحد من زيادة السكان عن طريق فرسهم واغاظتهم ورفع ضغط دمهم فيموتوا ويبقوا عملوا حاجة جامدة للبلد ؟! ترسل الاجابات عن طريق الاتصال علي رقم 0900 شوية ارقام ومن اي تليفون محمول علي رقم 22 رقمين ليبدأ السحب فورا لتكسب كمامة مجانية ضد امراض الربو والتلوث والصدر اخبارنا انتهت طاب مساؤكم !