الثلاثاء، 1 سبتمبر 2009
خدت اني اضحك من قلبي لما كنت اقرا زمان الهجوم والنرفذة في سطور الكاتب الساخر احمد رجب في كتبه دايماَ علي الجماعة مؤلفي المسلسلات واتهامه لهم دائما بأنهم راسبي إعدادية .. وفي كل رمضان اتذكر ما كانت اقرأه لهذا الرجل واضحك وأؤمن بأن كل ما كان يقوله صحيح ! لا اعرف حتي الان سبب واحد يخليني اشوف مسلسل واتابع حلقاته كل يوم الا في حالة واحدة وهي اني أكون بكره نفسي لدرجة اني احاول اجيبلها الضغط والسكر والكبت كل يوم .. كمية هايلة جدا جدا من المسلسلات لدرجة انك المفروض ترتبها بالابجدي علشان تعرف تعدها بس فما بالك لو تتابعها .. طبعا معروف الهدف الاساسي من وجود المسلسلات اساسا وهو الأعلانات وارجوك لا تنخدع بفكرة انهم عايزين يسلّوك و يرفهوك ويحكولك قصص تفيدك في حياتك فكل الكلام ده كلام فارغ .. بل المطلوب هو حشد اكبر كمية ممكنه من الاحداث المثيرة البعيدة كل البعد عن الواقع زي مثلا ان تدور الاحداث في فلل وقصور مش عارف دي موجودة فين في مصر ! و يكون البطلة بتحب ابن الخدامة - ودي قصة مسلسل لسة شايف منه لقطتين عشوائي كدا علشان لما اجي اكتب اكتب عن حق – زي مسلسل فيه بنت صلاح عبد الله رافضة عريس يتقدملها علشان بتحب ابن الخدامة .. ومنظر العيلة اساسا لايمكن انهم يستعينوا بخدامة .. وموسيقي تصويرية متوعدة ومط في الكلام علي أد المقدرة .. ثم يتخلل المسلسل لقطات لخناقات ودم وتكسير عربيات ودخول اقسام و أقلام تنزل علي صدوغ الفنانات من اجوازهم ومن الفنانات علي ولادهم .. وكام رقاصة علي كام ديسكو كأننا بنشوف فيلم عربي للكبار فقط وليس مسلسل ! ثم بعد كل ربع ساعة يظهر الهدف من عرض المسلسل اساسا وهو اعلانات الزيت والسمنة ولبن الأطفال وشقق القري السياحية والبيبسي والشيبسي و عروض موبينيل وفودافون الا انك تخرج بفكرة من المسلسل ده ولا تحس بتسليه !! أبدا وتشوف حاجات غريبة جدا منها مثلا منظر الفنانة حنان ترك وهي نايمة بحجاب كامل في مشهد من مسلسل اسمه هانم بنت باشا ..!! حجاب كامل مش مجرد تحجيبه كانها رايحة خروجه طيب حضرتك اتحجبتي واتقيتي ربنا يبقي تقعدي في البيت وخلاص ولا علشان تجمعي بين التدين والفلوس ومش هينفع تمثلي بشعرك تقومي تعملي مناظر غريبة ومش واقعية زي دي ! وغيرها من الفنانات اللي بيلبسو لبس اقسم بالله احنا لو في بلد تانية كان وزير الاعلام فيها اقيل بسبب وجود مناظر للكبار فقط جوه مسلسلات بتخش البيوت وبيتفرج عليها ولاد صغيرين وبنات ! اقرا مثلا خبر زي ده من اليوم السابع " تشكيلة رائعة وجديدة من قمصان النوم والبيبى دول وبألوان مختلفة تهل بها علينا غادة عبد الرازق مع كل حلقة جديدة من مسلسلها "الباطنية" ولإبعاد الملل عن المشاهد قررت غادة أن تهل علينا مع كل حلقة جديدة بلون وتصميم جديدين. ولا تفارق الشيشة غادة عبد الرزاق فى مشاهد المسلسل بدون داع، وهو ما رأته قناة الـ"إيه. آر .تى" مشاهد زائدة عن الضرورة الدرامية وحذفت الكثير منها , " يعني الابلة المفروض طالعة خدامة ايه لزمة بقي قمصان النوم الفاخرة اوي والبيبي دولات.. ده حضرتك خدامة ! وايه حكاية الشيشة دي كمان هيا ناقصة تخلف وفشل ؟! لدرجة ان القائمين علي القناة نفسهم اتكسفوا علي دمهم من المصريات واللي بيعملوه فقرروا حذف بعض المشاهد ! خبر تاني متخلف يقولك " استعان المخرج مدحت السباعى مؤخرا بالراقصة الفرنسية "كيتى" لتقدم استعراضا راقصا فى أحد مشاهد مسلسل "مشاعر فى البورصة" تحديدا مشهد حفل زفاف لطفى لبيب وهبة عبد الحكيم، " طبعا صباح الخير بالليل علي الصحفي اللي كتب الخبر علي الجرنال اللي نشره علي محتوي الخبر نفسه اللي بيديني اهمية الاستعانة بخبير اجنبي لمنتخب مصر ! قال استعان ياعيني براقصة - اد ايه الدراما عايزة – وفرنسية – مش عاجباه كمية الرقاصات اللي في مصر في الكباريهات واللي تحت التمرين في الشوارع ! بقي فقط اني اقول ان 90 في المية من فلوس وتكاليف تصوير المسلسلات بلغت مليار جنية .. مليااار جنية يعني الف مليون جنيه لو بتعرف حساب –.. بيتم دفع جزء كبير جدا منهم من وزارة الاعلام نفسها قطاع الانتاج يعني فلوس الناس اللي زيي وزيك والهدف الاساسي هو الاعلان والاستفادة من شركات السكر والسمنة والزيت والبطاطس والجبنة النستو بفلوس هتدفعها الشركات دي لما تعرف ان في مشاهدين ربنا يهديهم مش هيقوموا من قدام التليفزيون و قاعدين علشان يتفرجوا علي قميص النوم الجديد بتاع الأبلة غادة او علشان يتابعوا ايه اخر اخبار مراد بيه لما شركته الخامسة انهارت في البورصة ومشاكله المتوالية مع مراته اللي بتحب ابن الجيران في الفيللا اللي قدامهم اللي هو في نفس الوقت بيحب خدامة تعمل عند عم عيد سواق مراد بيه ! سلامو عليكو ! |
