مـزاجـك إيه ؟ سـادة ولا زيـادة !

الأربعاء، 5 أغسطس 2009

السلام عليكم يا قوم اليوم  انا في مود نفسي لا يعكره صفو اي شئ .. ومن المستحيل ان ينرفزني اليوم احد ! غريبة هي النفس البشرية فهناك ايام تكون فيها حياة الواحد مليئة بالاشياء الجميلة والمفاجآت السارة ومع ذلك تجده بائس مبتئس  .مخنوق وتجي  تكلمه يقولك  مش عارف مخنوق ليه . ( ايام كتير بكون فيها كدا )  ايام اخري تكن عادية الا ان الواحد بيحس فيها انه عادي ومش فارقه معاه وانه مستحيل يتنرفذ  ولو شرب منقوع نرفذه من عند العطار ! ولا فارقة . أهو انا النهاردة  كدا !  لا مبالاه فظيعة  ..ولكنها رائعة  - حكم انا اول مرة اصاب بالحالة دي - فاليوم رغم انه  لسه من اوائل ايام الأسبوع . والشغل علي ودنه .. والجو   هنا في الحي العاشر   حار حرا  رهيبا كأننا في مكة  نعذب بأيدي كفار قريش .  حاجة فظيعة !  و كمان النهاردة المواصلات كانت بسم الله ماشاء الله وصلت  شغلي بعد ساعة  والسواق كان بااااارد  وكانت الابتسامة علي وشه من  الودن للودن . وكان  بيقف لكل الناس رغم ان الميني باص  كان قطعة مصغرة  من مدرجات الدرجة  الثالثة  يوم ماتش بين الاهلي والزمالك !   وكان لا يستحمل ركوب احد ! ووصلت  الشغل علي المعاد بالضبط بالدقيقة والثانية . ورغم كدا لا توجد ادني درجة   من التوتر  عندي     الإيقاع الحيوى عامل ايه  النهاردة ! سؤال  يبان سهل  وكلنا نجاوب عليه بإجابة واحدة سريعة تلقائية هي  : الحمد  لله ! الا انهم بالغرب وفي اوروبا و  الدول المتقدمة يتأنون  جدا في  الاجابة علي هذا السؤال فعندما يقول لك مثلا عم شندويلي عامل ايه ؟! وتقول له الحمد لله بكل تلقائية رغم انك  وقتها ممكن يكون عندك مصيبة كبيرة  الا ان الأمر يختلف عندما يسأل  مستر جون  مستر فرانك ويقول له how do you do ? او  : whats  up وقتها يمكث  الرجلان وقتا لا بأس به في الكلام والتنفيس عن احوالهما معا والسؤال دفع الكثير من العلماء الي القيام بأبحاث عن طبيعة نفسية الانسان  الي ان توصلوا الي ان  تتابع الحالات النفسية علي المرء  و تبدل الحالات المزاجية  .. بمعني اصح المود  الفلاني  في اليوم الفلاني كما نقول بالعامية  : كله ناتج من شئ اسمه : الايقاع الحيوي او الدورات النفسية  داخل الانسان . دورة  عقلية واخري عاطفية ودورة  جسمانية هناك ايام نكون فيها  في منتهي النشاط رغم اننا اكلنا قليلا  مثلا او نمنا  أقل من المعتاد وهناك ايام اخري مهما  أكلنا وشربنا ونمنا واستريحنا  فتجد  الواحد  منا  بطئ  كسلحفاه  .كسلانا كـ فيل يوم  صباحيته .. بطئ  الفهم  ككثير من مخرجي المسلسلات  .. رد فعله ابطأ من مهاجمي منتخبنا الوطني   فماذا  حدث . الجواب هو :  الايقاع الحيوي عالم الماني  بيفهم  كدا  اسمه : وليم فيليس قام بابحاث ولاحظ ان الاعراض النفسية والبدنية بتتكرر كل  23 يوم و ان تلك  الدورات بتولد  مع مولد الشخص نفسه و  بتسير معاه بصفة منتظمة طول  عمره .. بعد الحرب العالمية الثانية حاول  علماء من سويسرا الاستفادة من ابحاث فيليس في محاولة  منهم لزيادة كفاءة العمال وتقليل نسبة  الاخطاء والحوادث و قلدهم اليابانيين وعملوا الدراسات علي عدد من العمال والمتطوعين  الا ان الناس وقتها  ما اخدوش الامر بالجدية اللازمة  ! في هذا الوقت  وقعت  كارثة من اسوأ  الكوارث في امريكا  وهي انفجار طائرة مدنية  كاملة  بركابها وثبت ان  كابتن الطائرة  كان في اسوأ حالاته الحيوية  لما وقع الحادث ..وفي سنة 73 بدأت الدراسات الجادة اللي اثبتت  ان نوع العمل بيرتبط بالايقاع الحيوي متكلمنيش  النهاردة ! الكتاب والادباء والموسيقيين يكونون في قمة نشاطهم  وابداعهم مع ارتفاع  منحني الدورة العاطفية والعقلية ..  اما اصحاب الأعمال البدنية فيبلغوا قمة   نشاطهم ونجاحهم  مع ارتفاع الدورة الجسمانية حتى المجرمين لايرتكبون جرائمهم إلا فى الأيام التى ينخفض فيها إيقاعهم الحيوى جدا ! طبعا لمن يستغرب الكلام و يعتبره ضربا من الخيال العلمي احب انقل لحضرتك الصورة في هذه الايام . اليابان في الايام دي بتدي اهتمام كبير جدا بالنظرية دي ..والغريب انهم قاموا بانتاج اله حاسبة صغيرة  مثل الآلات العادية  تكشف لحاملها  حالة ايقاعه الحيوي كل يوم  بالإضافة لتأديتها وظائف الآلة الحاسبة !   اما شركة  البرقيات في مدينة يوكوهاما  فتفرض علي خمسين في المائة من العاملين في قيادة دراجاتها البخارية واللي  بيعملوا في توصيل البرقيات إلى أصحابها أنهم يربطوا في ذراع القيادة بالدراجة البخارية شرائط حمراء وصفراء واضحة وفقاً لحالة إيقاعهم الحيوي ، فالشريط الأحمر يعني (إحذر السائق هو في أسوأ إيقاعه الحيوي) والشريط الأصفر يعني (انتبه السائق يمر بما قبل أو بعد أضعف حالاته) !! يعني يجيلك الراجل  النهادة و هو ملون  احمر تعرف علطول  ان يومك اسود  منقط ببني  لو كلمته كلمة  معجبتوش ! هذا عن اليابان وغيرهم  وعن السر  في تقدمهم المذهل  وكل حاجة .  وطبعا لو جه اليوم الي  هنسيب فيه الموت علي العيش في الأفران والتفكير  - المرفه في رأي البعض  - عن الايقاع الحيوي  طبعا تبقي تقابلني .. انا ببقي  موجود يعني  بس انتوا تعالوا ! طبعا في المقال مش عارف اوضح اكثر لاني نفسي ملمتش بالموضوع  بشكل حتي شبه كامل انما  بالبحث علي النت ممكن تلاقوا كتب ومقالات كويسة بتتكلم عن هذا المجال  تحسب ايقاعك الحيوي  ازاي ؟!   عن  طريق اللينك ده :   http://www.facade.com/biorhythm والموقع  اجنبي يقدم الحسبة دي لزوار الموقع .. وهناك طبعا لينكات لمواقع اخري كثير جدا ..يكفي انك تكتب في البحث كلمة  : biorhythm حط تاريخ ميلادك واتفرج علي المنحنيات  مع  ترجمة طبعا أن : Emotional:  بمعني الدورة العاطفية  او ايقاعك العاطفي Physical:  النشاط الجسمي Intellectual: الفكري   الغريب ان فعلا  لما عملت الحسبة دي  وجدت ان اعلي  معدل  لكل المنحنيات  هو الايام دي !   عامة ممكن تقوموا انتم بالحساب لانفسكم و نشوف هل فعلا الكلام  ده صحيح  .. وانك  مقتنع بيه أم  لأ !

اتــجــوزت خــلاص ... والسؤال اطلقها ولا لأ ؟!!

واتجوزت خلاص...   ايوة عملتها واتجوزت ..!!وميين : اخر من كنت اتوقع اني ممكن اتجوزها...! مرة واحد صاحبنا راح للكاتب الساخر  الامريكي اوسكار وايلد وقاله : يا سيدي ان زوجتي قبيحة ..!! اوسكار وايلد بأه مستناش ..وقاله الكلمة التاريخية واللي اتعملت مثل شعبي وحكمة :" كان اجدر بك ان تري نفسك في المرآه اولا ...!" بذكر كلمة زي دي لأن ناس كتيير تقول انت راسم نفسك لية يا كابتن انت عشان تقول :اخر من كنت اتوقع اني اتجوزها ...!! ..وانا بقوله ماشي كلامك صح ...بس اللي انا قصدي اوضحة انها مش وحشة بالمرة..بالعكس  ..جميلة جدا ..قمر  ..مالهاش حل ! بس مش ممكن واحدة زي دي تتجوز اصلا ..!! لية يا حبيبي ؟!( دة السؤال اللي فارض نفسه ..!) والجواب : استني هافهمك .. هبلة..!!! اه ..هبلة ...بمعني اخر بريييئة جدا....البنت زي القمر حتي لما كنا في الكلية كانت هيا الوحيدة اللي حسستني ان كليتنا مش مدرسة بنين..!! وكان كل الولاد هيتهبلوا عشان يكلموها...لان البنات التانية جنبها عاملين زي الصور ال4في6.....وهي بقي بوستر كبير متبروز !!! انما بعد مرتين تلاتة الطلبة بتقف معاها ...بيسيبوها علطول وبيهربو منها ...والسوال لية ؟.....والجواب انها بتحسسك بمدي ابتعاد و دنو مستواك عنها ...ايوة !   انك مش ممكن تستاهل واحدة زي كدا بالمرة ...البراءة دي كلها والجمال دة كله والرقة دي كلها..والصدق دة كله ...بجد حاجة اوفر لدرجة منفرة....ايوة اوفر ولو حتي في الكويس ...عمرك ما فكرت في كدا...؟ تخيل مثلا انك اجرأ واشجع.. واحد في الدنيا ..طبعا انت كدا بطل ...بس مش ممكن تعرف تعيش في الدنيا الا في مكانين ..: عنبر الكسور في القصر العيني ..!!..لأما عنبر الخطرين في العباسية ..!!...آدي مثال لا يقبل الشك..!!...تخيل بنت في الدنيا زي دي .......!! من وهيا صغيرة بتسمع كلام بابا وماما وما بتكرهمش ..وبتعمل الواجب وتشرب اللبن قبل ماتنام بدري ....وتطلع الاولي عالفصل...والمدرسات بيحبوها قوي وهيا الوحيدة اللي كانت بتقعد معاهم في اوضة المدرسات ( لان مافيش خطر منها بالمرة..!).....تجيب كل كشاكيلها وكاملة وعلي كل صفح الواجب نجوم ملونة بتضيع عليها مصروفها..وصور ميكي و بطوط و  ميمي .....وفي الثانوي عمرها ما قعدت ورا..ولا جت متأخرة ...!!...ولا لبست مخالف ...ولا طلعت رحلة ..و بتكلم المدرسين الرجالة وعينيها في الارض ...!!وبتروح تصلي في الفسحة...وبتقول الاذاعة...(دة في الثانوي ..)...وبناء علي كدة البنات بتكرها وبيدايقوها..ما بتعملهمش حاجة...بتروح تقول لمشرفة الدور ..!!! اما في الكلية ( اكيد كلية قمة قطعا يعني ..)....مش هقولك ما بتتكلمش مع اي شباب وبتاع...لا بالعكس ..دي بتكلم اي حد اي شاب ..لان فعلا مافيش حاجة في دماغها...بتاع الامن مع بتاع رش جنينة الكلية ...الواد اللي شايف نفسه الروش الروميو..والواد بتاع التيار الاسلامي اللي بيربي دقن طويييييييله ..وبيقص البناطيل من تحت لغاية لما يخليها عند ركبته..!!..تقعد في اي اسرة ..ما بتشاركش في انتخابات..!!..مالهاش دعوة بنشاط سياسي ..ولا اجتماعي ..ولا ترفيهي ..!! تخيل بنت زي كدا تبقي مراتك...تخيل كدا ..سبتها في البيت ورحت الشغل ..( وهيا طبعا مودعاك من البلكونة زي افلام مريم فخر الدين ..!)...وجيت لقيت بتاع الخضار حتي غالبها في الكلام والبيع......والبواب مابيردش عليها بس هيا متأكدة انه أكيد مشغول.......!!........وهكذا ... تقعد جنبها تتفرج علي ماتش الاهلي والزمالك..تقوللك فين الاهلي مش هو اللي لابس ابيض ..!!وتفتكر ان حازم امام هو خالد الغندور بس صبغ شعره..وتبقي اهلاوية فورا عشان انت اهلاوي ...!!! ايه رأيك في بنت زي دي .....عمرها يكبر ...وعمرها ما بتتغير .... لسة طفلة وبريئة وعلي نياتها ..وبتثق في اي حد....بتنام بعد المغرب بتلات ساعات عشان تصحي بدري تصلي قبل الشروق ..!! تتفرج علي سبيس تون و توم وجيري ..أما مسلسل فريندس..؟ هو قمة الانحلال فمبتكترش منه اوي ..اما فيلم بريف هارت....:  فهو فيلم رعب ولازم تشوفه جنبها عشان عالاقل تناولها المناديل وهيا بتعيط علي حبيبة ميل جيبسون اللي ماتت...!!!... تنام جنبها وفي بينكو عشرين عزول..أه.....دباديب ....!!..دباديب اكبر من حيوان الباندا شخصيا ....!! تتصل بيك في الشغل عشان تقوللك ان فية تحت السرير صرصار كبير ..وانك لازم تيجي بسرعة بقي عشان أنت الهيرو بتاعها...!! الارنب والقطة والكلاب اللولو مش عارفه ازاي لحد دلوقتي ما بيتحبسوش في جنينة الحيوانات في قفص الاسود..لانهم اشرس من النمور ...اما عن السجاير .....فأكيدأنا بطلتها ...لان السجاير :( بتعمل كااانسر...وما تشربهاش تاني حرام ...!!)   انت اية رأيك .....اتكل علي الله ... وأطلق ....ولا اعيش معاها وأخش بيها الجنة...؟!.         نسيت أقولك...لو اتطلقنا وسبنا بعض ممكن تعمل زي ماجدة في فيلم  المراهقات..وتنتحر...شكرا مش عايز نصيحتك ..انا هخش بيها الجنة !

عندما وجدت نفسي مضطرا وماشي ومش عارف أرجع !

عفوا أيها القانون ! مقطوعة في منتهي الجمال لعمر خيرت انصحك بتحميلها لو مش عندك يعني  و الاستماع ليها في هدوء كدا وتحاول تحس الراجل  اللي اسمه عمر خيرت ده كان عايز يوصلنا ايه في كل همسة و نبرة من همسات المقطوعة . فعلا تحسسك  بالمعني  والذي يمكن اختزاله في كلمة واحدة : عفوا  أيها القانون !   بحب أسمعها جدا خاصة وانا بتابع الجرايد .  حكم الدكاترة اليومين دول  من ضمن حكمهم الغالية و نصائحهم هي عدم الفرجة علي الأخبار نهائيا  او متابعة الجرايد وقرايتها   أيا كانت بدءاٌ من الأهرام مرورا بالمصري اليوم  وانتهاءاُ بميكي وبطوط وعلاء الدين !  غير لما تكون مرتاااااح علي الاخر ومسترخي  . ده اذا  كان ولا بد يعني تتابعها اصلا ! إلا اننا نحن الذين تتعلق اعمالهم وما يفعلونه في الحياة وترتبط بشكل مباشر بالاخبار ومصادرها  ومتابعتها وتبويبها وتصنيفها وصياغتها والتعليق عليها  والكتابة عنها : فللأسف  نحن في مأساه  نفسية كبيرة جدا  وبشهادة الجميع اتفضل إسئل اي واحد ماشي في الشارع مهما كانت درجة  ثقافته انشالله تسأل عم شندويلي اياه ضيفنا في اي مقال و تقوله ايه اسرع سكة للكفن  هيقولك متابعة حال الدنيا !   فعلا يا جماعة والكلام  مش تهريج يعني   أذكر مثلا ان هناك واحد من المحررين قبلي في الموقع . والراجل كان صحفي تحت التمرين .  تسببت الاخبار ومتابعتها كل يوم في تدهور حالته النفسية جدا لدرجة ان ظهرت علي كتاباته نوع من انواع السوداوية المبالغ فيها ادت الي فصله عن عمله ! هناك ايضا الكثير من المحررين والصحفيين والصحفيات  لا يعرفون السلام النفسي اطلاقا  ولا عمرهم حسوا بالصحة النفسية او الارتياح  والموضوع  معروف !   اخر الملمات  يا أعزائي اني رحت كشفت علي عنيا ! . ايون . حسيت فيها  بعد الكام شهر الاخرانيين  اني مبقتش اشوف بيها زي الأول  وان حدة رؤيتي اختلفت تماما  عن زمان . كان يضرب بي المثل في حدة البصر كزرقاء  اليمامة التي كانت تري العدو علي مسيرة ثلاث  ليالي !   وانا ايضا  كان  زملائي يتعجبون مني  . فكنت أقرأ لهم اليفط واللافتات  في عز الضلمة  ومن مسافات بعيدة  جدا لدرجة كانت بتدهشهم .  كان ممكن  كدا  اضرب عيني في اخر سطح اطول عمارة في اخر الشارع   والمحلك مثلا  نملتين  منهم واحدة  عندها  حسنة في خدها !   فعلا يعني كنت فظيع اما  دلوقتي  احب اقولك  اني بكتبلك  علي فونت زي  ده   :    ايوة ده ! مش عارف فيه ايه !   لأ والمصيبة ان عنيا بقت بتطرف بشكل جامد جدا  وفيها رعشة  في الجفن كدا  بتدايقني .  فعلي الفور خدتها من قاصرها   واتجهت لدكتورة  العيون  وهي بالمناسبة أمراة  في منتهي الرقي والثقافة  .سنها يفوق الستين سنة ورغم ذلك  جميلة كان لكلامها معايا  اثر في نفسيتي   .     وكان الحوار بدأ  باني اشتكيت  من الرعشة والرفة  وما  الي ذلك  وبعد الكشف طلع ان  نظري مفهوش اي حاجة ولا محتاج  حتي اركب نضارة ولو  علي سبيل المنظرة  .  اما رفة العين  فأيضا كانت  بدون سبب عضوي في العين .  بل انها  فاجأتني وقالت  ان  السبب هو  ان نفسيتي مش مضبوطة واني متوتر وعصبي زيادة عن اللزوم ! فقلت لها ان نفسيتي متوترة  وان اعصابي تلفانة  اليومين  الثلاثة   الثمانية  الخمستاشر  السنتين الي فاتوا كدا !   فقالت لي ابعد عن الانفعال وهدي نفسك   وغيرها من النصائح   اياها اللي بشوف ان طلوعي للقمر اسهل لي  من اني انفذها !  قالتلي  ايضا ابعد عن الأخبار ومتحاولش تتابع اي حاجة اليومين دول علشان  النفسية  . وان  يبني مراقبة الناس هتموتك بدري . وان من راقب الناس مات  هما .  وان  وان  وحاجات كتير كدا .   الا اني عندما  قلت لها اني بتابع الاخبار  وكل وكالات الانباء كل يوم  وبمنتهي الدقة  خبر خبر ومصيبة مصيبة بحكم عملي  :  فما كان منها الا  ان رقعت  بالكلمة   : يا دي الهم ..  دنتا  هتضيع  نفسك يا حبيبي !   تخيل مثلا انك كل يوم  بتفتح  كل  الجرايد :  اخبار  واهرام  وجمهورية  ومسا  ووفد   والدستور والبديل   والمصري اليوم  والغد  والمصريون والشروق واليوم السابع والاسبوع  ده غير المواقع علي شاكلة  مصراوي وايجي نيوز وماشي  ونسيج وايلاف  ده غير وكالات الأنباء  اياها  الله يخربـ.......  زي   طبعا الشرق الاوسط ورويترز  والسي ان ان  والبي بي سي  و  الاي  اف بي   و روسيا  و واشنطن !   ده غير حبة تحابيش بقي  زي القنوات الفضائية  زي الجزيرة  والحرة  و ام بي سي والعربية   وغيرهم  طبعا مما  خف حمله  و ثقل بلعه !    تخيل كدا اما  في جرنال واحد  بس  تقري   اخبار  عن   خمس حرايق و 4  جرايم  قتل  و حالتين  اغتصاب و مظاهرتين  علي اضرابين علي 5  6  7  قصف  من اسرائيل علي غزة  وامريكا  علي العراق  و امريكا بردو  علي افغانستان  علي حبة تحابيش بقي زي مشاكل  الإجتماعيات  ومشكلتك لها حل  ومين  اتجوز ومين  طلق و مين  بهدل  ومين عامل  البدع في مين ومين  حور علي  مين ومين  ضحك ونصب وسرق علي مين ومين  دخل السجن 598  سنة  من غير تهمة ومين  الفنان الي قتل واحد .قتللللل  واحد   وخد سنة  مش هيتسجنها   وكفالة  200 جنية !   الله يخربـ................... يا  جدعان !    استغفر الله العظيم   هناك  مقولة مش عارف قريتها فين ولا مين سمعهالي  بتلخص نظرية ان الدنيا دي  زي التليفون النوكيا بالضبط ! وان الحياة  الي بنعيشها دي لعبة سناك !  snake     ايون  متستغربش ! وانك  لو  لقيت نفسك  عمال تخسر فيها وبتقع ومش عارف تكمل  : يبقي لازم تغير الليفيل  بتاعك  . لأما   هتلاقي  كلمة  game  over  هي النتيجة  اللي لابد منها ! بمعني اصح  تجدد  وتغير مسارك المأساه بقي  معايا انا  اني  عمال بخسر بخسر  ومش عارف انزل بالمستوي بتاعي   كل اللي بحاول اعمله اني أغير اللعبة نهائي يمكن اعرف  العب غيرها  علي الموبايل ! الا اني  للأسف اكتشفت  بعد ان  فات  من الوقت الكثير : اني  مش عارف  العب  غير نفس اللعبة   .. واني  اتعودت عليها او هيا الي اتعودت عليا  وبقت  تستقصدني ! والله  أعلم

إلبسوا كارينا و إفرسوا فينا !

(( أنا هقولكوا على حاجة مش عارفة هتصدقوها وللا لا انا طبعا مش عارفة هي صح وللا غلط بس هقولكوا اللي شوفته وخلاص قبل ماتطلع باديهات كارينا والكلام الفارغ ده جالي إيميل من الكويت بيترجم لقاء مع حد مسئول في إسرائيل وفي اللقاء ده اتكلم عن نوايا كتير ومن أهم النوايا دي هو الاتجاه للبس المحجبات وتغييره بالشكل اللي يشوه منظرهم هي سنة تقريبا وظهرت البلاوي دي انا ماعرفش اللقاء ده كان صح وللا غلط بس هو ده اللي انا شايفاه أدامي عمري ماتخيلت أبدا إني أمشي في الشارع أشوف واحدة حاطة طرحة على راسها ولابسة تونيك فوق الركبة بحبة حلوين وتحته لابسة بنطلون كارينا وللعلم البنطلون ده حاجة زي الشراب الفيليه مافيش فرق يعني رش أول ماشوفت المنظر ده في الشارع أصحابي هما اللي مسكوني من إني أروح أهزأ البنت اللي كانت ماشية كده وفعلا ممكن تكون خدت بالها من استنكاري للمنظر دلوقتي أغلب البنات ماشية كده والله أعلم بكرة يمشوا بالمايوه وفيه طرحة برضه!! مش عارفة يمكن عشان شعرهم وحش وللا إيه دي أكتر حاجة هتجيبلي مرض في الزمن اللي احنا عايشين فيه ده طيب يعملوا اللي هما عايزينه بس مايلبسوش حجاب مايشوهوش منظره كده الحجاب مش اني أغطي لون فوق لون الجلد وخلاص الحجاب اللي هو لا يشف ولا يصف نفسي البنات تعرف الموضوع ده ربنا يهدي من الآخر احنا عايشين في عصر ربنا يستر علينا من غضبه يارب  اللهم آمين ))   انتهي الكلام والكلام طبعا ليس لي ولكنه منقول بالحرف من احدي الفتيات علي اكبر منتدي عربي تقريبا وبدون ذكر اسماء او لينكات ! دهشت صراحة اني أخيرا أري واحدة من فتيات مصر وفين ؟!  في 2009  يصدر منها مثل هذا الكلام الموزون والعاقل . و انها تكون علي شئ من الغيرة والغيظ من المنظر اللي بنشوفه يوميا باسم الموضه و  الاستهبال المبالغ فيه من بعض - وليس كل - البنات وبغض النظر عن ان هذا البعض  اصبح كثير العدد وكبير الانتشار  . ومثير للإستفزاز :  الا ان دايما في استثناء لكل شائع  ومختلف لكل منتشر وشاذ لكل قاعدة ، بنات علي قدر من الحياء والإحترام  وليس لنا الحكم علي داخل أحد بل لنا فقط ما تقع عليه اعيننا  . هذه القلة من الفتيات  هي الحسنة الوحيدة و القشة التي يتعلق بها بعض الناس وخاصة قلة من شباب ايضا علي شئ من الاحترام و( الخير لسة جواهم  ) مثلما يقولون موضوع الحجاب المودرن .  ولبس البنطلون موضوع اصبح كبحر من كثر اتساعه و لا يمكن باي حال من الاحوال الالمام بيه في بضع أسطر مهما طالت المساحة ومهما انعدم الملل من تكرار الكلام فيه .  موضوع الحجاب بتاع اليومين دول مرتبط بشكل مباشر جدا ولا ينفصل بأي حال من الأحوال عن طريقة لبس الفتيات من النوعية السالفة الذكر  .  فمن تلبس البنطلون  ومعاه الكارينا و الفيلية والمحزق والملزق والمشبك ! فلا حجاب لها من الأصل و صحة ما تقوله عن انها محجبه هي نفس صحة مزاعم اسرائيل عن احقيتها في القدس .  وعلاقتها بالحجاب  بالضبط زي علاقتي كدا  بعم  شندويلي  غفير مبني بلدية كفر نوي البلح ( معرفوش ولا عمري شفته ! )    ولا كلام ازيد من كلام البنت اللي اتكلمت في اول المقال . ولا خاتمة افضل من كلام د. أحمد خالد توفيق في وصفه لهذا الحجاب الا انه :   " حجاب يُلبس على الجينز أو الثياب الضيقة مع ماكياج كامل يدغدغ في الرجل الشرقي ذكريات عصر الجواري؛  فالفتاة تلبس ما تحب لكنها تضع إصبعيها في عين من يجرؤ على أن يطالبها بالحجاب الصحيح..  ولو لم تجد لها مكانًا محجوزًا في الجنة فلسوف تندهش بحق." !  انتهي الكلام ولكم السلام  !

كدبة ابريل .. وكل سنة وانتم كدابين !

اعزائي كل سنة وانتوا طيبين . الحقيقة معرفش علي ايه  بس هو الجو اليومين دول بيحسسني اننا في مناسبة ما  لست ادركها الا اني اليوم بسؤال احد زملائي وجدت ان النهاردة اول ابريل . فافتكرت فورا ان ده اليوم العالمي للكدب المسمي بيوم ( كدبة ابريل ) الحقيقة اني اسمع كل سنة عن هذا الموضوع  الا اني كنت باعتبره عجيبة من العجائب يعني الي كل يوم الواحد بقي بيشوفها  وبيسمع عنها زي ما انا  النهاردة لقيت حتة ورقة في رغيف العيش وانا بفطر ! انما عادي يعني مدتش اهتمام بالموضوع ! انما هذا العام بالذات قررت اني ادعبس وراء هذه القصة ( قصة كدبة ابريل ) لاعرف الضبط ما معناها و قصة الاحتفال بهذا اليوم في اوروبا ايه ! قصة كدبة ابريل . صح ولا كدبة ؟! اغلب الروايات المشهورة علي النت تسند كذبة ابريل في اوروبا وخاصة اسبانيا : انها جائت ايام الفتح الاسلامي لأسبانيا والاندلس . فقد  حار الاسبان في معرفة قوة الدين الاسلامي وتماسك المسلمين في قطعة من قلب اوروبا .. فبعد تفكير عميق توصلوا الي ان اسهل طريقة لاضعاف المسلمين الاسبان وخاصة الشباب  منهم  :  هي ارسال الخمور والسجائر الي اسبانيا  مجانا . وبالفعل بدأ الضعف والوهن يتغلغل في نفوس المسلمين واتجهوا للعربدة والبحث عن الملذات ..الي ان قضي الاسبان علي الاسلام بأسبانيا  شيئا فشئيا  وانتهي الأمر بسقوط الاندلس ثم غرناطة .بعد 800 عام وجود الاسلام بها كان سقوط غرناطة بتاريخ 1 ابريل . الأمر الذي جعل الاسبان يطلقون علي هذا اليوم ( خدعة ابريل ! ) التي عرفت فيما بعد ب كذبة ابريل . ومن تلك السنة الى الآن وفي كل سنة يحتفلون بما يسمونه ( خدعة ابريل ) وهم باحتفالهم بذلك اليوم يعتبرون المسلمين حمقى ! وبغض النظر عن ان هذه القصة حقيقة او لأ ( عن نفسي شاكك في صحتها جدا ) الا ان العادة نفسها والشهرة الي خدتها  في اوروبا واصبحنا هنا نقلد هذه العادة علي سبيل المزاح:  ليس معناه علي الاطلاق ان  يوم 1 ابريل فقط  هو اللي بيبقي فيه  كدب مثلا ! فبالصلاه عالنبي الكدب اساسا  كل يوم بيبقي بالفدادين والالسنة قلما تنطق بالصدق الا نادرا  في استثناءات كدا بين الكدبة   والتانية او بين الكدبات  علي غرار التسلية بين الوجبات ! يوم واحد ابريل مقدس في اسبانيا دينيا اما في المانيا فهو يوافق يوم ذكري قائد الماني شهير  هو بسمارك موسوعة جينيس تقول ان اليوم ده اكثر بلد بتكدب فيه هي رومانيا وبريطانيا . واقل البلاد استخدام لكدبة ابريل  هي كندا       بتكدب في اول ابريل بس ولا في ابريل وغير ابريل ؟!   في رأيي الشخصي ان الناس – وانا منهم ــ  بتلجأ للكدب  مش علشان  هما جبنا مثلا او نتيجة للضعف الانساني في بعض الاوقات بل ان الناس في رأيي تكذب لأن الصراحة بشكل ما لها وقع علي الآذان  مش كويس خالص يعني .وان الصدق رغم انه افضل . الا ان عواقبه بشكل ما في بعض الاوقات بتبقي غير مستحبة ! تخيل مثلا عم شندويلي قاعد مع مراته ومرة واحدة هيا بتسأله انتا ساكت ليه فيقولها بكل سلامة نية  زي  محمد سعد ما صرح لصاحبه في فيلم كتكوت : والله جعدتك غم يا غريب ! تخيل بقي مدام شندويلي ممكن تعمل في جوزها ايه وقتها ! والامثلة كثيرة واحدة ضحت بحياتها علشان  عرفت اهلها انها بتحب ..مثلا ! واحد خسر شغله علشان اعترف لواحدة من زبائن الشغل انه بيحبها ومعجب بيها ! وغيرها من المواقف التي تستلزم ان الواحد يداري ما يعتمل في نفسه والا يصارح به اي أحد . ولو  سئل او وضع في موقف ما يستلزم الاجابة او التفسير فأنه يضطر الي الكذب ! غير ان هذا لا يمنع ان الكدب ممنوع اطلاقا عمال علي بطال . ففعلا  الكدب بدون داعي للحصول علي المال او  الشهرة او الظهور بمظهر جيد . الي أخره .  كل هذا  في رأيي يجعل صاحبه تدريجيا يخسر نفسه وينضم لقطيع الكدابين . و  الشخص الذي يكذب مرة او مرتين لا يعتبر كدابا كداب لغويا هي صيغة مبالغة علي وزن فعال ,  تفيد معني الاستمرار في عمل الفعل والانغماس فيه الي ان يصبح الواحد من فاعل الي فعال .. وهو الفرق بين كاذب وكذاب !   وفي الحديث : يظل الرجل يكذب حتي يكتب عند الله  كذابا , وقد أحل الله الكذب في اوقات ثلاث وقت الحرب  وعند الصلح بين الاصدقاء وبين الازواج بهدف استمرار الحياة  و مسايرة الاوضاع وارضاء الطرفين يعني لو مراتك قالتلك انتا أمور  مثلا انتا شيك انتا كويس انا بحبك  كل ده   تبقي  عارف كدا الليلة ماشية ازاي J!  وانتي كمان تبقي عارفة لو جوزك قالك انتي أمورة انتي سكر انتي دمك خفيف انتي زي القمر .  تعرفي علطول بردو  ان الله احل الكدب في المواقف الثلاث  وان  انتي بتشهدي فعليا موقف منهم J ! قبل ما اختم  لازم اقولكم علي اشهر كدبة في التاريخ  في رأيي هي  كذبة تحت القسم  او التلفظ بالكذب تحت اليمين  .  وهي طبعا  كدبة الأخ  الشقيق بيل كلينتون . رئيس امريكا  الاسبق عندما كذب  رغم حلفانه انه و حياة الأخوة هيقول الحق في المحكمة وقال  انه ميعرفش مونيكا لونيسكي سكرتيرة البيت الأبيض   المتهم بالعلاقة الغرامية معها وانه ولا حتي سمع عنها في طبق اليوم ! طبعا كان كداب     وكمان قبل ما اختم  نسيت اقولكم اني  لما لقيت ورقة في الرغيف النهاردة وانا بفطر : ان الكلام ده محصلش واني  كنت بكدب عليكوا :) وكل سنة وانتوا طيبين !