عاوز تــذيـــع .. قول ذيـــع !

الأربعاء، 5 أغسطس 2009

لو سمحت انا  عايز اذممك ؟ لا معلش  اوعي ايدك وخليني أذممك ؟ بذمتك يا سيدي بذممممممتك  وانا راضي ضميرك وشهادتك حط نفسك في موقف زي ده انتا شاب خلصت  جامعة وبتقدير كويس .بشهادة متميزة ومطلوبة   . خرجت من الكلية لقيت  الناس كلها بتقول كورسات كورسات ومفيش شغل الا لما تحسن مستواك في اشي انجليزي و فرنساوي وكومبيوتر , و  icdl  و mcp  و bbc  و  kfc    ولخبطة لغاية لما الواحد بقي بيدخل ال wc   بيفتكره  كورس  هو كمان ! المهم حضرتك  خدت كورسات بالشئ الفلاني  إشئ انجليزي علي فرنساوي علي موريتاني و خدت الرخصة الدولية  لسواقة الكومبيوتر .  تلك الشهادة المتخلفة  المسماه  بال icdl   حيث يدرسون لك  منهج برنامج  ميكروسوفت اوفيس اصدار 2000    مع العلم   اني بكتب لحضرتك المقال دلوقتي علي اوفيس  2007  و لا تعليق مش كدا وبس  ده انتا حضرت دورات في التنمية البشرية  وخدت شهادات في البرمجة اللغوية العصبية   مثلا  ( علم جديد هو  والحمد لله اني كتبت اسمه من غير غلطات املائية ! ) هذا ناهيك   عن دورات وكورسات أخري يأخذها المرء  حسب ما يريد العمل به . بدءا   من كورسات الفوتوشوب والتصاميم  مرورا  بالبرمجة بلغات السي و الجافا  والكنافة وغيره .   باختصار :  دفعت دم قلب والدك  و حرقت قلب  والدتك  و  دماغ سعادتك اتبهدلت لحد ما  تبقي - جود كواليفايد - علي رأي الجماعة بتوع ال hr  وهم   جماعة جديدة ظهرت من  اللاشئ هذه الايام   معظمهم كانوا من العواطلية   فإذا هم يخترعوا  علم جديد بوظيفة جديدة تقوم  علي انهم يختاروا  من العواطلية المتقدمين للشركات ما يناسب  العمل بها  حسب مؤهلاتهم ! ويقومون بالرد  علي الشباب المتصلين بالشركات واللذين استجابوا لاحد اعلانات الوظائف الخالية ! ويقومون بالانترفيو . اي المقابلة الشخصية مع سعادتك  - عقبال منشوفك موظف كدا - علي اساس  انهم بقوا  خبراء في تحليل الشخصيات وفرز العقليات  وانتخاب القدرات و فهم  لغة العيون واشارات الايدي و حركات الكرافتات مع الهوا  ليتنبئوا  مثلا  ان  الجالس امامهم  هذا  مؤهل تماما ليعمل لدي  شركتهم ! المهم انك  بعد ما عملت  كل ده واصبحت مؤهلا  جيدا يا عزيزي كي تنزل وتحتك  بسوق العمل .  فما  باقي الا انك  تبحث  عن الوظيفة نفسها  . هناك كلمة امريكية شهيرة جدا  تقول :  البحث عن وظيفة : وظيفة في حد ذاتها ! وهذا يا ولدي صحيح فانت تقريبا تعمل لكن من منازلكم.  تصحي الصبح بدري من اجل اللحاق بالطبعات الاولي  من الجرائد . تبحث في الوظائف الخالية بلا تعب او كلل  او ملل . ثم تقوم مثل باشكاتب الحكومة بكتابة  الاعلانات كوبي بست من الجريدة الي ورقة  منفصلة خاصة بك تدون عليها رقم الشركة الفلاني او المكتب العلاني  كي تتصل بهم  فور انتهائك مما تفعله  فهكذا يا ولدي تجمع بين  موظف الحكومة التقليدي الذي يقوم بالكتابة  ثم تتحول  الي تلي سيلز  - مندوب مبيعات بالتليفون - فتقوم بالاتصال و الرد بلباقة و حسن  حديث مع العميل ! كل هذا  طبعا لا ينسيك خطوة بينية مهمة وسط كل ذلك وهي عمل  السيرة الذاتية او السي في  . ومن الواضح ان السي في اختراع  جامد والدليل انها مكانتش موجودة زمان ومع ذلك نسبة البطالة زمان مش زي دلوقت . جميل ! المهم بعد صناعة هذا الاختراع  وهو عبارة عن ملف انقح من بتاع س و ج في اي نيابة ، عن كل شئ في حياتك بدءاً  من اسمك وسنك  وتاريخ ميلادك  لحد لون عينيك . هكذا اصبح كل شئ تمام  وما عليك  الا النظر في الاعلانات  لتجد منظر  مثل  هذا  .   بذمتك  بعد كل ده  ومرتبك  في الوظيفة دي هيكون  200  جنية .  رد  فعلك  هيكون ايه ؟! 200 جنية 200 جنية .  اي  انك  ستستلف عليهم لتكمل تكاليف  المواصلات فقط ! . اي انك تقريبا  مفيش فرق بينك وبين عامل نظافة في هيئة تجميل ونظافة القاهرة في لقاء سابق مع احد العبيد في قريش زمان . أكد ان سيده  اللي اشتراه ( واحد من الكفار يعني ) دفع  فيه اكثر من ال 200  جنية دول . اي والله ! مش عارف الحقيقة  اوصف احساسي او اكتب تعليقي علي صاحب شغل  عنده دم واحساس بالكمية دي . وهل هو منزل الاعلان علي سبيل الفكاهة يعني ولا  مقلب  وكدا  وبعد ما تتصل  هيكلمك  ابراهيم  نصر ويقولك  عايز تذيع  قول ذيع مش عايز بردو  قول ذيع ! انا عايز   اهاجر من البلد  دي والله من اللي الواحد بيشوفه ولذلك  ليس  غريبا  ان نقرأ  في الجرايد  خبر زي ده القاهرة  تشهد كل يوم  عدد كبير من  حالات الانتحار .تم حصر 10  الاف  منهم في القاهرة  وحدها  السنة الفائتة فقط  . والمعظم شباب ! وانا اراهن ان  معظم الشباب  دي  منتحرتش من  قلة  مرتب زي كدا .  بل من الغيظ   من البشر دي  اللي مصممة علي استفزاز  الجميع  بكل الطرق فالراجل مكلف نفسه وحاطط اعلان بفلوس  علي اساس  ان  حد هيتصل  بمرتب زي ده ؟! لا وكاتب يفضل  احد سكان  مصر الجديدة او مدينة  نصر .  حقيقي هي إز  فيري سمارت !  يعني هو واحد ساكن في مصر الجديدة  بيفطر كل يوم عصير جريب فروت او في مدينة نصر بيصرف علي  اللبان  50   او  100  جنية  . تتخيل انه  هيرضي بوظيفة زي كدا الا علشان يختبر بنفسه اذا كان الموضوع ده فعلا حلقة   كاميرا خفية ولا لأ ! انا مش عارف حقيقي الناس دي بتاكل ايه .  وهل ده مثلا  مرض وانتشر يعني  استفزاز بهذا الشكل ؟ ولا هي حاجة في الهوا مثلا ولا  ميكروب في المية ! احب اقول  لكل واحد زي ده .   صدقني العلاج بتاعكوا  مش غالي يعني   هو صحيح  الحقنة بتوجع شوية  لكن معلش  استحملها   وهتبقي كويس  خالص و  هتبقي بني أدم  عادي  زينا  .فيك  مخ وبتفكر  متقلقش !

منتدي أم فتكات يرحب بكم !

سؤال بسيط في الاول .. تقدر تستغني عن النت ؟! اكيد لأ .. واللي مش هيجاوب بلأ يبقي اكيد مش موصل نت اساسا ! اعرف ناس كتير ممكن يبقي مزاجها وحش جدا اليوم كله لو صحيت والماسنجر مفتحش ! واكيد ناس كتير عانت في الايام اللي كابل النت البحري فيها باظ بفعل فاعل لما طلع الوزير في التليفزيون وقال ان سمكة قرش عجبها طعم الكابل قامت واكلاه ومعاه سلطة سي فود ! في حياة كل منا اشياء تعتمد علي الانترنت بشكل كبير . في السابق ومن كام سنة كانت مواقع الانترنت قليلة جدا وتكاليف برمجتها و تصميمها غالية جدا . اما الان ومع كثرة الطلب زاد عدد المعرضين .فالسلعة نفسها كترت ورخصت ! بمعني كثرة تغلغل النت ومواقعه في حياة الناس جعلت مواقع النت تنتشر جدا .و المنتديات بالذات . وبعد ان كانت المواقع قليلة وتحمل اسماء المنظمات الكبيرة والشهيرفقط مثل هيئة حقوق الانسان و وزارة الخارجية مثلا و السفارات والجامعات والي اخره . وصل بناالامر بالصلاه عالنبي اني افتح النت دلوقتي الاقي منتدي مدرسة المشاغبين . موقع أم احمد .فتكات دوت كوم. الطبلاوي دوت نت ! قهوة هريدي و موقع كتكوت وفكك مننا والي اخره! والاسماء حقيقية والكلام ليس تهريجا ! فعلا علي النت الأن مواقع هي الغرابة بعينها . واسمائها وخدماتها اغرب . والسر في ذلك في رأيي هوالغيرة الشديدة ومحاولة الفوز بمكان في قطار التكنولوجيا باي ثمن وبغض النظر عما اذا كان الفرد نفسه ده بيفهم في الموضوع ولا لأ .مثلما نشاهد مثلا المعلم شندويلي من كفر نوي البلح . مش بيعرف يفك الخط بس معاه موبايل بكاميرتين ! وتيجي تكلمه يقولك ده ثري جييييييي .. وانه في كمرة ( يعني كاميرا في القاموس )* . وكارت 2 بيجا ( يعني جيجا في القاموس بردو ) .طبعا تستعجب وتسأله طب ليه كدا يا معلم شندويلي اللي انتا عملته ده وانتا مبتفهمش في الحاجة طب ايه اللي جابرك علي كدا ؟ فلا يجاوبك . الا انك بالبحث في اعماق نفسه ستجد انه عمل كدا لأن المعلم شمندوري جاره جاب من شهر موبايل بكمرة واحدة (لمعرفة معني كمرة انظر اعلاه توجد ترجمة ! ) * نفس القصة تحدث هنا . فالدكتورعبد المجيد وهو وزير سابق ورئيس جمعية كبير حالي قام بعمل احد المواقع وليكن عبد المجيد دوت كوم ! يعرض فيه كتاباته ومقالاته و مؤلفاته واخبار الجمعية ، حقه طبعا ، فما دخل الاستاذ عبد الغفور وهو مدرس أول موسيقي بمدرسة هيفاء الثانوية بنات مثلا انه يعمل موقع علي النت هو كمان ؟! نفسي اعرف كشري دوت كوم شهد النت يا اعزائي اخيرا موقع كشري ابو طارق ! نعم يا اخي الفاضل وممكن تدخل السايط ( السايت يعني في القاموس ) من هذاالرابط http://www.aboutarek.com/ وي طبعا واجهة الموقع وفيها صورة المعلم ابو طارق وصباح الانطرنط يا معلم (الانترنت يعني في القاموس ) رائع حقا ! موقع اخر جميل قطعا . هو ذلك الموقع الذي افتتحه الأخ رمزي عن العرقسوس !!! الله يا جماعة مش ممكن يعني تخيل لما اعدي عليك كدا واقولك ايه الموقع اللي انتا فاتحه ده ..فتقولي عادي يعني ده موقع عرقسوس ! لا وتلاقي فيه شوية اقسام زي العرقسوس في لغات العالم زي ما في الصورة و العرقسوس واثره في نهضة الحضارة العربية قديما وعلاقته بالاوروبية حديثا والي اخره ممكن تدخل من هذا الرابط لو عطشان يعني ! http://www.ramzlicorice.com/ اما المواقع الاجنبية فهي اخف بصراحة من كدا فهي معمولة لتكون نوع من انواع الـfun ليس اكثر ومن اغرب المواقع الاجنبية موقع طبعا مدفوع فلوسه وتم حجز اسم للموقع ( دومين): كي تفتح حضرتك الموقع تطلعلك صفحة بيضاااااا . و مفهاش غير كلمة واحدة بس هي : someting ممكن تدخل تعاين من هنا www.something.com طبعا اصحاب العقول في راحة وفكرت كتير اني الاقي فائدة واحدة تعود علي صاحب الموقع ! ملقتش . ده حتي الاعلانات مش موجودة . طب خير يعني ؟! موقع تاني غريب جدا لا يحتوي الا علي فلوس كتير في خلفية وبتكتر كل ثانية من الوقت .وهي لعبة بصرية اكثر منها اي شئ اخر ممكن تتفرج عليه من الرابط : www.stagnationmeansdecline.com ********* وإليكم أكثر المواقع حزناً وهو موقع sorry موقع تفتحه تلاقي دموع عمالة تنزل وكلمة انا اسف بخط كبير .. وبجد نفسي اعرف مين اللي انتا زعلته للدرجة دي علشان تتأسفله بموقع كامل يا جدع ! http://www.iamveryverysorry.com والموقع ده كمان يعتبر مرجع كامل لكل الشخصيات الاجرامية في التاريخ . مجرمين علي قتلة علي سفاحين لحد حرامية الخزن يعني . ولا تتوغل يا عزيزي في الموقع كثيرا كي لا تتأثر بهم وتفعل مثلهم ! شاهد من هذا الرابط http://www.mayhem.net/Crime/serial.html. ********* وده موقع غريب جدا لكن لذيذ فيه مجموعة كيرة من الالعاب البصرية والخدع بطريقة تخلي دماغك تلف ويجيلك صداع وبردو بننصح انك متطولش علي الموقع ده . حقيقي بيجيب صداع ادخل عليه من هذا الرابط http://www.khayma.com/zwaya/strang.htm ********* وأيضاً باستخدام الموقع التالي يمكنك رؤية ومشاهدة منزلك من السماء.. اذ انه يوفر لك كاميرا سماوية لكل بلاد ومناطق العالم.. يمكنك تقريب الصورة الى أي درجة تشاء وباستخدام الماوس فقط.. موقع فريد أنصحك حقاً باستخدامه ادخل عليه من هذا الرابط http://www.flashearth.com/ واخيرا اللي يعرف فيكم موقع تاني غريب سواء بتاع كشري او عرقسوس او قشر الفول السوداني : فياريت يقولنا عليه من خلال التعليقات دمتم بخير

فـــــرافــــيـــر !

بيقولك مرة واحد تاية بيسال واحد ماشي في الشارع اقرب طريق للمستشفي ايه . قاله غمض عينك و عدي الشارع ! اهو احنا في مصر بقينا بالظبط زي اللي سمع كلام اخينا وقام مغمض عينية و بيعدي الشارع اللي بيفتح التليفزيون ويتابع الاخبار كل يوم فعلا هيتأكد اننا هنموت نفسنا علشان نقرب جدا من حافة الانهيار التام ! تابعت كما تابع الكثيرين في مصر الخبر اللي بيقول ان في مجموعة جديدة من العيال الفافي ( اصلها ناقصة ) ظهروا كدا من العدم . وان مقرهم الدائم والاساسي هو موقع الفيس بوك . واجتماعاتهم في سيتي ستارز ! المجموعة الكتيتة سموا نفسهم (ايمو) وطبعا انا اترجاك ياعزيزي ان تمسك نفسك وتخلي بالك من الاشياء القابلة للكسر في البيت عندك وانتا بتتفرج علي الصورة الموجودة مع الموضوع واللي بتبين واحد من اعضاء ال( الجماحة ) دي ! وكلمة (ايمو) معناها عاطفي .او Driven HardcorEmotivere Punk اي متمرد ذو نفسية حساسة فاعضاء الشلة اللذيذة دي سموا نفسهم كدا لانهم يأسانين من الحياة وانهم بيتميزوا بالحساسية الشديدة ! فقرروا يعملوا الجماعة دي وبتضم أي عيل حساس ويائس ! صلاة النبي كأننا مثلا – بما اننا مش مشتركين في الجماعة دي يبقي مش بنحس مثلا ! .. ولا مجربناش حاجة اسمها اليأس ! مهو كلنا بنعاني يوميا من يأس بالكيلو وبالرطل والقنطار . منهم انا مثلا . فهل فكرت اعمل جماعة اسميها ايمو ولا سوسو ولا كيكي ؟! مش عارف بجد العيال دي جرالها ايه . ومين قال ان طالما الواحد يأس يبقي متميز عن باقي الناس ! الحساسية هي صفة لاي انسان . واليأس ملازم لحياة الانسان مثلة مثل السعادة والالم والانشراح والاكتئاب . كلها مجرد مشاعر تتبادل علي نفسية الانسان خلال حياته مهما تطول او تقصر فهي متغيرة ولابد منها . وحتي ولو هذا حصل و قرروا يعملوا جمعية ولا جماعة ولا جامع ! . ايه الداعي انهم يقوموا بجرح ايديهم ورجليهم و يلبسو لبس ضيق جدا وبنطلونات زي بتاعة البنات ويعملوا شعرهم بالتسريحات الغريبة دي زي اللي في الصورة ! ثانيا اعتقد ان 90 % من شباب مصر ولو كانوا ضايعين ضايعين يعني : لا يمكن يفكروا ولا يعملوا العمايل دي بالمرة والدليل ردود الشباب نفسها عليهم في الفيس بوك فأحد الاعضاء وهو احمد فبيقول في افيه ساخر شهير : حلوان اتضربت يا رجالة . في اشارة الي ان رجولة العيال دي ضاعت ! شاب اخر وهو ابراهيم يتساءل : انا مش عارف دول بيمشو فى الشارع ازاي . مبيتكسفوش ؟! وانا اقولة متخافش دول مش بيمشوا في الشارع اصلا حكم انتا عارف يا اخ ابراهيم ان المعاكسات زادت اليومين دول والتحرش . بالاضافة ان لو واحد ايمو شاف راجل حقيقي قدامه ممكن يتخض ويعيط ! اميرة بتقول : الله يهدهم احنا ناقصييين ارف وبلاوى ؟! وايضا ابراهيم في تعليق اخر بيقول : انا شايف انهم عار على العرب جميعا دول المفروض يطردوا برة مصر بجد انا مش مصدق اللى شفناه امبارح على دريم ( في اشارة الي الحلقة التي استضافوا فيها الامامير ! ) الاخوة اعضاء الجماعة يعترفون ان مظهرهم الخارجي وملابسهم تشبه الشواذ لكن ينفون ان يكونوا شواذا ! ( الجملة بالنص من احد المواقع الاخبارية ) وانا تعليقي ان الشذوذ شذوذ عقل وشخصية ومظهر خارجي قبل ان يكون اي شئ اخر ! فما فائدة ان اكون ارجل واحد في الدنيا بس شكلي كدا ! الموضوع مش محتاج كلام ! اخيرا والله العملية مش ناقصة بالمرة بنات بتسترجل ولا رجالة بتستبنت ! ولا جماعة تانية تطلع مسمية نفسها الفرافير فكفاية بجد . البلد دي فيها اللي مكفيها وبجد لازم اي مسئول او اي حد بايده يعمل حاجة يعملها لان توالي الكوارث بالمنظر ده : لا معني ليه الا انها اشارات قبل حدوث شئ اكبر واهم وان علينا الاستجابة وفعل اي شئ علشان منبقاش زي الواحد اللي كل ما يشوف البرق : يضحك عشان يطلع حلو فى الصورة !

يوم 8/3 وان يكون عيد ميلادك ترابي . . خالي من الاصدقاء !

كل سنة والجميع بخير .  اولا : بمناسبة انتهاء الشتاء اخيرا و انتهاء عصر التكتكة و البطاطين والجواكت المنفوخة والانفلونزا ..          حقيقي احساس جميل بانك تخفف هدومك وتودع المطر والليالي الكئيبة ذات الليل الطويل .! ثانيا : مناسبة  هي المولد  النبوي الشريف وكل عام وانتم بخير  و جمهور دكاترة الاسنان ايضا لان المولد ( مولد الحلاوة طبعا )   هو الموافق ليوم تحولهم الي مليونيرات ! ثالثا:   مناسبة اخري  هي عيد  ميلاد  العبد لله ويوافق النهاردة  3,8  اليوم بالتمام والكمال تميت ال 24 سنة في هذا الكوكب الغامض الغريب العجيب . كل سنة  وفي مثل هذا اليوم .افكر بشكل كبير في فلسفة ان الواحد يكون عنده عيد ميلاد ! فانا الحقيقة عن نفسي  مش بحس بفرق كبير يعني . لان في البيت عندي مش بيفتكروا  عيد  6  اكتوبر يبقي مش معقولة  هيفتكروا  عيد ميلادي ! وسنة ورا سنة وعيد ميلاد  وراء اخر . اعتدت علي نسيان  او تجاهل  العيد ميلاد الي ان  تكسرت  ذكراه تماما  علي صخرة نسيان الاهل كما تكسرت اصنام قريش علي أيدٍي المسلمين  ...   فيا للمأساه ! يوم عيد ميلاد الواحد يا اعزائي يوم مميز .. فانتم تنظرون له نظرة ان هناك سنة جديدة قادمة ..طبيعتكم المتفائلة  هي التي تصور لكم ذلك .. اما انا بطبيعتي الواقعية و التي يطلقون عليها متشائمة علي سبيل الدلع : اجد اني فقدت سنة من عمري وان هناك سنة سابقة قد انقضت ولن تأتي مرة اخري  مهما  حصل . اجد اني خطوت  خطوة اخري نحو الـ ....    ولا بلاش كفاية تشاؤم لحد كدة الحسنة الوحيدة  بالنسبالي في ذكري الميلاد اني ممكن استغل بعض الناس انهم يعملولي شوية خدمات علي حس عيد ميلادي. فاذهب لزميلي في العمل  واقوله علشان خاطري اعمل كذا بدالي . وقبل ما يركب الوش الخشب ليا  اقوله بسرعة و النبي دة النهارة عيد ميلادي يا جدع .. فيفعلها ..عن قهر  ام  طيب  خاطر  والله ما اعرف .. اروح  لاختي الكبيرة  .وبمنتهي التكبر : اعمليلي شاي .. ولسة  هتتطربني بالمحاضرة اياها عن التفاهم والتكامل والارادة وتحقيق الذات والاعتماد علي النفس في عمل الشاي ، وضياع وقت الاخرين في عمل شاي للأخرين وان الوقت كالسيف ان لم تقطعه قطعك   وهي غير مستعدة لتضيع 3 دقائق كاملة من وقت الأمة العربية في عمل شاي لاحد المأفونين المتحذلقين . وما ان اذكرها بعيد ميلادي فما تلبث ان تقوم بعمل الشاي وتقدمه لي  بمنتهي التعاون . ان عيد ميلادك يا عزيزي فرصة لك كي تعرف قيمتك عند من تحب وعند من تعرف . فكم من اتصالات تليفونية تتدفق عليك .. وكم اشخاص يسألون عليك .  وكم من اخرين يهنئونك واخرين يأتونك بهدايا ،الي اخره . الا ان ذلك ليس مقياسا . لاني مثلا  مشفتش النهاردة  غير  3 بس قالولي كل سنة وانتا طيب ! العيد ميلاد لا يكون عيد ميلاد حقيقي الا في حالة وجودك في المنزل .اي بمعني اصح . مأجز ( واخد اجازة يعني ) ..اما اذا تصادف وطلع يوم شغل .. فصدقني الموضوع عادي يعني . هتصحي عادي بدري وتلبس هدومك تركب مواصلاتك توصل شغلك تقعد علي مكتبك تسلم علي زمايلك لتجد ان اليوم انقضي ولا عيد ميلاد ولا يحزنون ! العيد ميلاد الذي يكون  في بداية الصيف وانتهاء الشتاء يكون عيد ميلاد جوه  غريب !  فلا هو برد ولا هو حر .. بل يوم  بارد صباحا حار ظهرا  ..ترابي علي جميع الانحاء لدرجة غلق عينيك وانتا بتكتب الكلمتين دول ! هييييه دنيا ..  كان معكم من علي مكتبي في الشغل .. صالح فاروق

خسرانة خسرانة ؟!

عجبني جدا المثل الشعبي اللي بيقول : قرد قالوله هنسخطك .. قال هبقي غزالة يعني ؟ مش فارقة ! مش عارف الحقيقة المثل ده مين اللي قالهولي وللا انا اللي اخترعته .. لكن المهم انه بيحمل معني جميل جدا ! فهو نفس فكرة المثل الأخر الذي يقول ضربوا الاعور علي عينه . قال خسرانة خسرانة ..! بشكل اوضح . لو احنا كرجالة خدنا حقوقنا المنهوبة من الستات كما يزعمون . فاحنا كدا كدا لينا حقوق تانية بالكوم مش واخدينها علي المستويات الاخري . بداية بالمستوي الحكومي الي الاجتماعي مرورا بالقانوني والرياضي الي أخره ! فجت علي دي يعني خلاص ؟! ولا مش عارف يتشطر عالحمار قال اتشطر عالبردعة ! فالرجال في مصر اخر ما سمعنا منهم انهم يفكرون جديا في انشاء جمعيات لتحقيق المساواة وحفظ حقوقهم امام المجتمع والقضاء علي ظاهرة العنف النسائي ضدهم ! والكلام حقيقي وليس تهريج ! فقد اثبتت الدراسات الحديثة ان : سيدات مصر أصبحن أصحاب الرقم الأعلى في التصدي للأزواج متفوقات على كل سيدات العالم بمن فيهن الأمريكيات اللاتي جئن في المرتبة الثانية بنسبة تبلغ 23% والبريطانيات اللاتي جئن في المرتبة الثالثة بنسبة تبلغ 17% ثم الهنديات المسكينات في المرتبة الرابعة بنسبة 11% فقط بينما المصريات جئن في المرتبة الأولى منذ عام 2003م بنسبة 23% وارتفعت بعد ذلك عاماً بعد الآخر لتبلغ 28% في نهاية العام 2006م. .. و أكدت دراسة اخري قام بها المركز القومي للبحوث الاجتماعية : ان السنوات الماضية شهدت زيادة في معدلات ضرب الزوجات لأزواجهن لتصل في عام2003م إلى 23% ثم ما لبثت ان ارتفعت في الأعوام التالية إلى 28% وهي من أعلى المعدلات على مستوى العالم مقارنة بالحوادث المماثلة في عديد من الدول. ففي الولايات المتحدة تصل هذه النسبة إلى 23% وفي بريطانيا 17% والهند 11%.. وتبين ان النسب الأعلى تكون في الأحياء الراقية والطبقات الاجتماعية الأعلى، أما في الأحياء الشعبية فالنسبة تصل إلى 18% فقط ! كل ده ادي لقيام اصوات رجالية من اللي هية . تزعق وتصرخ وتجعر وتنادي بان نهب هبة رجل واحد . وان نأخذ من كل قبيلة رجلا . لنقضي علي اتباع الجنس الجديد ! قصدي جنس الستات .. وبلا رجعة ! وانا اقول بكل ثقة : مش اما تعرف الاول تعمل اي حاجة تانية تبقي تقدر علي دي ؟! خلاص يعني عرفنا ناخد حقوقنا في كل حاجة ومش فاضل الا دي ؟! عرفنا نقضي علي كل حاجة غلط في الحياة وبقي كله تمام وبقي فاضل ان الستات الوحشين التنانين اللي بيطلعوا نار من مناخيرهم بيضربونا وبيبهدلونا بلبسهم الفظيع في الشوارع و الخلع في المحاكم علشان ناخد حقنا منهم وننشئ جمعيات تقف معانا امامهم.. مهو حقهم بصراحة ..قالوا لفرعون يا فرعون ايش فرعنك ..قال ملقتش حد يلمني ! في مثل تاني شهير جدا فيما معناه .. : انك لولا انحنائك ما تعلق باكتافك احد ! بمعني اخر: راجل من اللي بقينا بنشوفهم .. بيروح شغله بينافق في مديره وبيكدب علي طول الخط وبيسرق وبيقبل الرشوة وبيتوسط لمعارفه علشان يشغلهم في اي شغل حتي لو مبيعرفوش فيه وبيستغل سلطته في تسهيل حاجات كتير ومصالح ليه و لمعارفه . وبيقعد عالقهوة يلعب دومينو وطاولة زي العيال الصغيرة و مش بيتفرج الا علي روتانا سينما وسايب مراته وبناته يخرجوا بالبادي والبنطلون الجينز او بأي هدوم تانية من الي بنستفظعها كل يوم .. واحد شايف بنته بتفتح قدامه باب البيت علشان تخرج و يتفرج علي منظر بنته عريان بالشكل ده وبالنسباله عادي ان اي حد يتفرج براحته عليها !.. و مش بيمارس حياته الزوجية الطبيعية غير بالفياجرا ( 6 مليار جنية سنويا علي الفياجرا .. والرقم من مصر ! ) وبيشرب حشيش ( 68598 % من رجالة مصر بيشربوا حشيش !! ) وبيسمع اغاني بعرور وشعبان وجرجير وغيرهم من اللي بينزلوا قصائد في شرب الحشيش وعشق العنب والبلح وقرع العسل . و مهما يحصل أدامه مش بيتكلم وحاطط لسانه جوه بقه رغم قدرته علي فعل شئ . بمعني اخر لا علاقه له بالرجولة غير شئ فسيولوجي كلنا عارفينه ! . مش هو ده النموذج المنتشر الأن والقلة اصبحت في نقص مستمر ؟! واحد زي كدا مراته مش هتضربه ازاي ؟! مش هتبص لواحد غيره ازاي ؟! لو الحياة معاه كويسة هترفع عليه قضية خلع ليه ! ..اكيد في حاجة هيا محتاجاها منه وملقتهاش فيه ! اخيرا .. المعروف ان لما الرجل بيفسد .. الست هيا كمان بتفسد ..وبتتحول تبعا لتحوله .. لو فعلا المجتمع ده بقي فيه رجالة بجد هنلاقي كمان فيه ستات بجد وطول ما فيه اشباه رجال ..هيبقي فيه اشباه ستات ! اخبارنا انتهت طاب مساؤكم !